Vawiin khan Chief Minister’s Conference Hall-ah State Supervisory Board chu an Chairman, Health Minister Pu Lal Thanzara kaihhruaiin an thukhawm.
Meeting-ah hian sawrkar laipuia Ministry of Health and Family Welfare hnuaia ‘the Pre-conception and Pre-natal Diagnostic Techniques (Prohibition of Sex Selection) (Six Months Training) Rules, 2014’ phut angin, doctor specialist ni lo, ultrasound khawl hmang tur te chuan Competency Based Assessment thla 6 chhung awh training an neih zawh hnuah exam pal tlang a ngai dawn tih tarlan a ni a. He certification ti tur hian Aizawl Civil Hospital hi Mizorama Accredited Institution awm chhun a ni. Kum 2017 atang chuan Aizawl Civil Hospital-in a certify loh te chu State dangah training lo nei tawh mahse Mizoram chhunga ultrasound khawl reng reng an hman a rem dawn tawh loh thu tarlan a ni bawk.
He meeting-ah hian State Supervisory Board Secretary, Dr. Lalbiakkima, Hospital and Medical Education Director chuan Mizorama PC&PNDT Act kalpui dan tlangpui report a pe a. State Nodal Officer Dr. Lalnunsiama pawhin he Competency Based Assessment nei tura hma an lak dan leh exam buatsaih tura ngai te peihfel thawkhawt a nih thu a tarlang bawk. He inhmuhkawmah hian Board thutkhawm hnuhnunga thil rel bawhzui tawhte thlirletna neih nghal a ni.
Law & Judicial Department leh Social Welfare Department aiawhte chuan sex ratio chungchangah Mizoram chu dinhmun tha pawlah ding hrih mah ila, hmasawn zel tura inzirtir uar a tul thu an sawi bawk a ni.
Health & Family Welfare hnuaia State Supervisory Board hi July ni 17, 2015-a din niin thla 4 danah inhmuhkhawmna neih thin a ni a, chumi report chu sawrkar laipuiah thehluh thin a ni.
