Vawiin chawhnu khan Health & Family Welfare Commissioner & Secretary, Pu Lalrinliana Fanai, IAS kaihhruaiin a Office Chamber-ah ‘State Level Task Force Committee for Pulse Polio Immunization’ an thu khawm.

Meeting-ah hian WHO Aizawl Unit Surveillance Medical Officer Dr.Lalhlimpuii chuan zeng hri danna hman lai mek trivalent oral polio vaccine (tOPV) atanga bivalent oral polio vaccine (bOPV) a thlak a nih tur thu leh awmzia a sawifiah a. Zenghri (Polio Virus) hi chi thum - P1, P2 leh P3 a awm a. Tuna zenghri danna thlawr chi hman mek tOPV ah hian P1, P2 leh P3 laka invenna a awm a. P2 hi kum 1999 atang khan khawvel pum huapa a rem tak avangin leh P1 leh P3 laka invenna a lo chak zawk theih nan April ni 25 atang hian trivalent OPV atangin P2 awm tawh lohna bivalent OPV hman tan a ni dawn ta a ni, a ti.

tOPV hmang mek khawvel ram hrang hrang 156 te chuan April ni 17 atanga May ni 1 chhung hian tOPV atangin bOPV ah an inthlak vek dawn a. India sawrkar pawhin bivalent oral polio vaccine (bOPV) hman tan ni tur atan April ni 25, 2016 chu thlangin National Switch Day a vuah a. Hemi ni hnu lam atang hi chuan India ram pumah tOPV hman a nih tawh dawn lo a ni.

State Immunization Officer Dr. Lalzawmi pawhin tOPV atanga bOPV a inthlak tura sawrkar inpuahchah dan a tarlang a. Inbuatsaihna tha taka neih niin April ni 25 atang hian Mizoramah pawh hlawhtling taka kalpui tan theih a nih tur thu a sawi a. Zenghri danna pek dan Routine Immunization chu a pangngai a kalpui a nih tur thu a sawi bawk.

Committee-ah hian Health & Family Welfare Department, I&PR, Social Welfare Department, Autonomous District Council hrang hrang, WHO, UNICEF, Rotary Club leh MHIP General Headquarters aiawhte an tel a ni.