1022/2024-2025

Aizawl the 1st July, 2024: Vawiin khan 'STOP Diarrhoea Campaign 2024' hawnna Mizoram chhunga District hrang hrangah neih niin a hawnna pui ber Tanhril Health & Wellness Centre-ah neih a ni. Kumin thupui-ah hian 'Kawṭhalo ven nan faina leh ORS a pawimawh' tih hman a ni.

Campaign hawnna programme hi Dr. Eric Zomawia, Mission Director, National Health Mission in a kaihhruai a; Dr. Lily Chhakchhuak, State Programme Officer, RCH in ‘STOP Diarrhoea Campaign’ chungchang sawifiahna a nei.

Dr. Vanlalsawma, Principal Director, Health & Family Welfare Department chuan Campaign hawnna hun hmangin, campaign hawn a ni ta chu lawmawm a tih thu a sawi a. Mizoram-ah kawṭhalo avanga nunna chan awm tawh lo se a duh thu leh chumi tura thawktute pawhin ṭan la turin leh mipuite pawhin zawm tur te tha takin zawm se a duh thu a sawi.

Line Department atangin Pi Zoramthangi, Director, Women & Child Department pawhin thusawiin, Health & Family Welfare nena thawhhona ṭha tak an nei chu lawmawm a tih thu a sawi a. Women & Child Department pawhin kawṭhalo avanga nunna chan an awm lohna tura theihtawp an chhuah mek thu a sawi bawk. Dr. Hmingthanmawii, Addl. Director, H&FW Dept. chuan lawmthu sawiin hun a khar a ni. 

'STOP Diarrhoea Campaign' hi kawṭhalo do beihpuithlakna, kum 2014 atanga lo hman ṭan tawh niin kum tin fur ruahtui tam hma/tam laia hman ṭhin a ni. Mizoramah pawh India ram hmun hrang hrang rualin lo hman tawh thin a ni a; kumin pawh hian July Ni 1 atanga August ni 31 chhunga hman leh tur a ni. 'STOP Diarrhoea Campaign' hawnna hi Aizawlah leh District tinah te vawiin khan a ruala neih a ni.

India rampum huapin naupang thihna 6% hi kawṭhalo vang a ni a. He dinhmun hi Mizoram state dinhmun ni chiah lo mahse, kawṭhalo hi naupang natna tlanglawn tak, enkawl vat loh chuan thihpui theih natna a ni. STOP diarrhoea campaign chhung hian naupang kawṭhalo enkawl nana tha ber 'ORS leh Zinc' ṭhatna nasa lehzual zawka inzirtirna pek a ni leh dawn a. ASHA-ten an mahni bial chhungah naupang kum 5 hnuai lamte hnenah kawthalo enkawlna turin ORS an sem ang a. Sawrkar damdawi in leh Subcentre-ah te leh Anganwadi Centre-ah te 'ORS-Zinc Corner' siam a ni ang. Heng hmun siam bikah hian naupang kawṭhalote chu enkawlna pek an ni ang a. ORS siam dante, Faina chungchangte leh ORS leh Zinc pawimawhna te a hmuna thawktuten an hrilh thin dawn a ni.

 STOP Diarrhoea Campaign thu ken tlangpuite chu:

·        Naupangin khawthalo a neih veleh ORS leh tuiril lam chi, tam thei ang ber pek nghal vat tur, khawthalo a reh hma ORS pek chhunzawm reng tur.

·        Naupang khawthalo chu ni 14 chhung Zinc pek tur a ni a, khawthalo a reh hnu pawhin ni 14 chhung Zinc pek ngei ngei tur a ni.

·        Naupang khawthalo tana ORS leh Zinc pek hi treatment him a ni a, khawthalo a tidam chak a ni.

·        Naupang/naute hnute hne lai khawthalote chu eitur/hnute pek thulh loh tur, an damloh lai leh dam hnu pawhin tha taka eitur pek zel tur.

·        Tui thianghlim fai taka vawn chauh in tur

·        Naupang khawthalo ek chu rang tak leh him takin paih tur.

·        Nuin nau chaw a siam dawn emaw nau chaw a hrai dawn emaw nau ek a tihfaiin emaw  sahbon-a fai taka kut sil zel tur a ni.

·        A hnuaia ziak anga naupang a awm chuan, Health Worker hnenah emaw Damdawi inah emaw rang taka kal tur a ni:-

o   Naupang khawthalo chuan zual lam a pan zelin

o   Tuiril leh hnute hne tha theilova a awmin

o   A ekah thisen a kaiin

o   Tui leh tuiril lam a in tlemin

o   Khawsik a rawn neihin

·        Khawthalo chungchanga biakrawn duh nei chuan bialtu ASHA-te biak tur a ni.

·        Khawthalo veilo naupang tan ORS chu hmun ro thaah dah that tur. Khawthalo a neih chuan ORS pek vat tur a ni a, ORS packet dahthat chu alo expire/chhiat tawh chuan alo sak/khal ang, chutianga a awm chuan paih tur a ni. ORS packet thar Sub Centre-ah laktur a ni.