3293/2022-2023

Aizawl, the 18th January 2023 : Sub-Committee on Conference, Programme & Event Management chuan vawiin khan March ni 2, 2023 a Aizawla G20 business meeting lo awm tur programme an duan leh ruahmanna an siam te thlirho te chu Sub-Committee Chairman Pi Esther Lal Ruatkimi, Principal Secretary, Commerce & Industries hovin a Office Chamber ah an thlirho.

Pi Esther Lal Ruatkimi chuan G20 meeting lo awm tur hi Mizoram tan inpholanna hun remchang leh tha tak mai a nih theih thu sawiin kawng hrang hranga Mizoramin kan hlawkpui theih dan hi kan ngaihtuah tel a ngai a, chumi atan chuan sumdawnna hawi zawnga kan theihna hi a taka kan pholan thiam a ngai, chutiang zawng chuan a meeting pui ber pawh hi duan chin a ni, a ti. Sawrkar leh mipui ang pawhin kan theihna zawn theuha theihtawp kan chhuah a tul dawn tiin a sawi bawk.

Meeting ah hian programme lo duan lailawk te, ruahmanna hrang hrang lo siam te leh heng atana sum leh pai mamawh dan te sawiho a ni.

Tarlan tawh thin angin Mizoram hian G20 Business Meeting hi March ni 2 khian a thleng dawn a. Hemi chungchang ruahmanna siamte a hmuna lo ena, Mizoram Sawrkar aiawhte nen meeting nei turin G20 Chief Coordinator, Foreign Secretary lo ni tawh thin, Pu Harshvardhan Shringla leh a hote chu Aizawl ah January ni 27 ah lo kal tura beisei an ni.