4410/2025-2026

Kolasib, the 11th February, 2026: Vawiin chawhma dar 11:00 khan Pu H. Lalramliana MCS, Sub-Divisional Magistrate, Kolasib chuan a pisa-ah Youth for Kolasib kaihhruaina hnuaia din Joint Action Committee (JAC) hruaitute ko-in, Kolasib khawchhung kawngpui siam mek leh hmalak dan tur chungchang a sawipui.

Pu H. Lalramliana, SDM chuan JAC ten NHIDCL Office hual an tum nia Social Media atanga hriat a nih thu leh, hetiang zawnga hmalakna hian boruak thalo zawk a thlen palh a hlauhthawnawm thu a sawi a. NHIDCL leh kawng siamtu Contractor-te rikrap leh ti thlabar zawnga chetna chuan kawng siam hna a tih thuanawp theih zawk avangin an thil tum chu kaltlangpui lo turin a ngen a ni.

SDM chuan Contractor-ten an hna zo fel tur hian July ni 7, 2026 thleng hun an neih thu tarlangin, hetih lai hian mi thenkhatin High Court lamah thlenin hma an lak avangin Contractor-te hian April ni 30, 2026-ah chuan an hna an zawh hman tur thu Affidavit hmangin an thehlut nia hriat a nih thu a sawi a. He thil hi High Court chuan a thlir reng thu leh hnathawkte hmasawn dan pawh a en zui reng thu a sawi bawk. Hetiang hi thil awmdan a nih avangin, tuna hnathawktute hna ti bahlah thei leh mipui nunphung pangngai ti buai thei boruak siam lo turin Pu H. Lalramliana chuan JAC hruaitute chu a ngen a ni.

He hunah hian Youth for Kolasib (JAC) hruaitute chuan NHIDCL leh a hnuaia Sub-Contractor ten an hna an thawk chak tawk lo leh mipuiten harsatna namen lo an tuar mek chu pawi an tih thu an sawi a. Hemi chungchanga an lungawilohna lantir nan February ni 16, 2026 (Thawhtanni) hian Diakkawn YMA Hall atanga tanin College Venga NHIDCL Office pan a, Office hual tura ruahmanna an siam thu an tarlang a. An lungawilohna chungchang thu hi Ministry of Road Transport and Highways (MoRTH) leh Mizoram Governor hnenah thehluh an tum thu an sawi bawk.

Inkawmkhawmna ah hian Addl. Superintendent of Police, Sub-Deputy Commissioner, NHIDCL Office awmna College Veng khawtlang hruaitute leh YMA hruaitute pawhin JAC te hmalak tum dan chu boruak thalo thlen palh theihna a nih avangin, ruahmanna him zawk leh tha zawk kawng dang dap turin JAC hruaitute hi a ngen bawk a ni.

Vawiin thutkhawmah hian Sub-Divisional Magistrate, Kolasib hi Pu K. Laltluangliana, Addl. SP leh Pu Lalthanzuala, SDC ten an tawiawm a. Pu Andrew Vanlalauva, VCP College Veng leh Pu Andrew Lalrintlinga, Secretary YMA College Veng te leh Youth for Kolasib (JAC) hruaitute an tel a ni.