Assembly Committee peng pakhat Subject Committee-II chuan Champhai leh Serchhip-a Sorkar hmalakna thenkhat te enfiah a 27.10.2015 an chhuak chu vawiin khan an zo fel a. Subject Committee-II hi an Chairman Pu T. Sangkunga bakah member zingah Pu R.L Pianmawia, Pu Nihar Kanti Chakma leh Pu Lalruatkima te kalin, Rural Department hnuaia BADP hmalakna te, Forest Department plantation-te leh Tlawva-a Mini-Hydel Project kalpui mek te enfiah a ni.

Subject Committee-II hian October ni 27 khan East Lungdar-a BADP sum hmanga Hmingthangi Higher Secondary School sak chu an en bakah Khawbung-a Tlawva Mini Hydel Project sak tan mek chu an enfiah a. Ni 28 khan Khawbung bial a Forest Plantation hrang hrang te a hmunah an en bakah BADP sum hmanga Hlakungpui Mual pavement leh Cultural Centre-cum-Museum sak te chu an tlawh a. Heng bakah hian vawiin thleng khan Dungtlang Community Hall leh BADP sum hmanga hmalakna pawimawh dang te leh hmun hrang hranga Forest Plantation-te an enfiah bawk.

Subject Committee-II hi Pu H. Lalrinawma, Joint Secy; Pu Lalhmahruaia Zote, Deputy Secy bakah Forest Department atangin Pu V. Lalfala, Conservator of Forests, Central Circle leh Pu Vanlalchuailova, DFO Champhai; RD Department atangin Pu A. Chhalai, EE, BADP leh Pu Malsawmtluanga, AE, BADP; P&E Department atangin Er. Thangzagina, SE, Project Circle-II leh Er. Lalrinkima, Sr EE, Tlawva Project ten an tawiawm a. Vawiin khan Champhai-ah District Administration leh Rural Development Department-a official thenkhat te nen inkawmna hun an nei nghal a ni.