No.1586/2021-2022
Aizawl the 28th July, 2021 : Sumdawng, dawrkai, thlai leh thei zuartute chu an thil zawrh pakhat mah chheprelh lo tur leh a man (Rate) pangngai aia tova hralh lo turin hriattir an ni.
Pi Ramdinliani, Food, Civil Supplies & Consumer Affairs Department Director chuan nimin khan hriattirna siamin sumdawngte, dawrkai leh thlai, thei zuartu zawng zawngte chu sawrkar dan zawm vek turin a hriattir a. Tun dinhmunah ramri-a harsatna kan tawh mek avangin kan nitin mamawh chawkluhna kawngpui ber pawh a ralmuang rihlo hle a, tun dinhmunah kan nitin mamawhte engemaw hun chhung khaihlak thei a ni a ti a ni.
He hriattirna zawm lova man chhuahte chu Legal Metrology Act, 2009 leh Prevention of Blackmarketing & Supplies of Essential Commodities Act, 1980 dan hmang tein hrem an ni ang tih FCS&CA Director hian a sawi bawk.
Tin, nitin mamawhte to uchuak taka zuar thinte chuan mipuite dikna leh chanvo an palzut a ni tih hriain mipuite chu Consumer an nihna anga mahni dikna leh chanvo te Consumer Protection Act, 2019 Section 17 dan hmanga humhalh anih theihnan mahni awmna District theuhva Deputy Commissioner/District Magistrate te hnenah thlen thin turin a hriattir bawk a ni.
