Vawiin khan Lunglei HPC Conference Hall-ah HPC Lunglei in SEDP hnuaia Convergence Scheme a kalpui tur Business Plan intihsiakna ‘Leitlangpui Rahbi’ chungchangah Dr Lalrinchhana, Deputy Adviser cum Deputy Secretary hovin meeting leh Press Conference neih a ni. He hunah hian Planning Department hotute, Lunglei MJA member te leh Entrepreneurship Master Trainer te an tel. He intihsiakna hnuaiah hian sumdawnna bultanna atan Rs.2.50 lakhs thleng puihna dawn theih a ni.

Dr Lalrinchhana chuan Leitlangpui Rahbi Competition in a tum ber chu mahni kutke a ding tura tumna leh duhna neite, sumdawnna "idea" nei, bultanna tur sum nei silo te tan tana Business Idea hmanga inelna a ni, a ti a. Planning Department hnuaia Mizoram State Entrepreneurship Development Monitoring Committee (MEDMOC) chuan Mizoram pum huap entrepreneurship intihsiakna te hlawhtling taka lo kalpui tawhin Mizo entrepreneur-te pawhin eizawnna ngelnghet leh hlawhtlinna an hmu chho mek a ni, a ti a. He intihsiaknaa tel tur hian kum bithliah a awmloh thu leh mi tu pawh mahni kutke a ding tura tumna leh duhna nei, eizawnna bultanna tura "idea" nei te a huam vek thu sawiin mipui a tam thei ang ber he intihsiaknaa tel ve ngei turin a sawm a ni.

Leitlangpui Rahbi hi nimin (6th June 2019) khan Mizoram Chief Minister Pu Zoramthanga’n Convention Centre, Lungleiah a tlangzarh a. He intihsiakna hnuaiah hian sumdawnna bultanna atan Rs.2.50 lakhs thleng puihna dawn theih niin sumdawnna lo kalpui mek tawh te pawh an tel thei a ni. Sawrkar hnathawk nghet te erawh tel ve phal a ni lo.

10th June, 2019 (Monday) atangin dilna form HPC Office, Chanmari, EKC – Lunglei Government College, EKC – HATIM leh DIPRO Lunglei atangin a lak chhuah theih ang. Planning Department website www.planning.mizoram.gov.in/ ah a form download tur a awm bawk. 15th July 2019 thleng dilna a thehluh theih a ni.

Hemi chungchang chiang leh zuala hre duh tan HPC, Lunglei Office (9436771110) bakah EKC Lunglei Government College (9862179044), EKC-HATIM (7628971272) leh DIPRO Lunglei (8974213605) ah te a zawh fiah theih e.