Vawiin khan Food Civil Supplies and Consumer Affairs Department chuan an Minister Pu John Rotluangliana hovin Chaltlang Tourist Lodge-ah Officers meeting pawimawh tak an nei a. Kum kaltaa an hnathawh dan thlir letna leh kumin kum thara hmachhawp an neih te an thlirho.

Pu John Rotluangliana chuan kum 2017 February thla tawp lam atangin kum tluan deuh thawa ruah a sur chungin Department-in mipui mamawh, a bik takin buhfai tluang taka an sem thei chu lawmawm a ti a. Harsatna leh mualphona em em tawk lo va kum kalta an hmang tlingtla thei chu hnathawktute tanrualna leh inpekna vang a ni, a ti. Boruak inthlak danglam nasa avangin khaw chin chhut thiam a harsa a, fur chhiat vanglaia mipuiin buhfai eitur an tlakchham lohna turin hemi hun chhung atana buhfai dahkhawl ‘monsoon stock’ buaipui tan a tul, FCS&CA Minister chuan a ti a. Supply Department hna chu nakina thawh tura khek theih loh, thawh zawh nghal zel ngai a nih avang leh mipui nena inhne renga hna thawk, mipui mamawh ei leh bar petu an nih avangin fimkhur leh taima taka hna an thawh a tul a ni, a ti. Pu John Rotluangliana chuan FCS&CA Department a enkawl chhungin a tha zawnga thil inthlakthleng tam tak a awm a, VIP te tana quota awm thin leh special permit nuaibo a ni a, FCI atanga economic cost a buhfai lei thin kha man man zawkin local purchase a thlak a ni a, sum cheng vaibelchhe 4 bawr vel zetin sawrkar a hlawk phah niin a sawi. Minister chuan kudam panna tur approach road siam that a ni dawn tih he meeting-ah hian a sawi lang a, a thawktu tur firm thlan tawh niin NABARD sum hmangin hmun 82 ah siam a nih tur thu a sawi a ni.

FCS&CA Secretary Pu H.L.Rochungnunga, IAS pawhin thawktute thawhrimnaah lawmthu a sawi a, mi te ber fairel bel thleng phaka hna thawk an nih avangin thahnemngai leh zual turin a chah. DCSO te fuihin an bial chhunga thil thleng an hre hneh hle tur a ni a, harsatna chinfel mai theih chu hotute thu pek nghak lovin hma an la thin tur a ni, a ti bawk.

Kum 2017 chhung khan District hrang hrang hnuaia Supply Centre 48 ah fur ruahtui  tam laia mipui an tam loh nan thla engemawzat daih buhfai dahkhawl lawk a ni a. Fur laiin khaw tam tak kawng chhia avanga  motor-a tlawh pawh theih loh ten buhfai an dawn theih phah a ni. Kum 2017 chhung khan kum dang zawng aiin ruah tui a tam a, hmun kilkhawr zawk tlawh pawh theihloh tam tak a awm bawk a. Department-in Monsoon Stock Programme a kalpui avangin a hun takah mipui ten quota an dawn theih phah a ni. Kum 2018 ah pawh Monsoon Stock hi kalpui chhunzawm tum a ni.

FCS&CA Minister Pu John Rotluangliana kaihhruai annual meeting-ah hian DCSO ten report pe in an bial dinhmun leh harsatna tawhte an tarlang a. FCS&CA Director Pu Abhijit Vijay Chaudhuri, IAS chuan thu tawi sawiin meeting hi a khar a ni.