No.1713/2021-2022

Kolasib dated 6th August 2021: Vawiin chawhma khan Govt. Diakkawn High School, Kolasib, Khuangpuilam 4C atana hman tur a ruahman chu Food, Civil Supplies and Consumer Affairs Minister Pu K.Lalrinliana chuan hawnna hun a hmang a, Pu Robert V.L.Hruaia, Chairman, VLTF, Khuangpuilam chuan hun kaihruaiin Dr.R.K.Lalthlamuana, SMO chuan 4C inkaihhruaina kawnga hriattur pawimawh hrang hrang tarlanna hun a hmang bawk a ni.

Minister chuan hrileng darh mek zelah khawtlang tlawmngai pawl hrang hrangte inpeknate ropui a tih thu a sawi a,"Hri nen a len dun thiam hi kan mithiamte ngaihdan a nih tawh avangin kan khawtlang pawh hian fimkhur tak chunga hrileng kar a khawsak thiam hi kan inzirtir a pawimawh hle a ni" a ti. Hrileng kar a ramri buai leh vawk pul hri leng ve mek chu ram mipuite thinlungah intodelh tumna nghet taka tuh nungtu ni ngei tura a duh thu a sawi a, khawtlang himna tur ngaituah a VLTF-ten mahni vengchhung mi hrikaite thlamuang taka mahni vengah ngei enkawl annih theih nana inpekna thuk tak nen a Khuangpuilam 4C din a ni chu lawmawm a tih thu a sawi. Minister chuan Khuangpuilam 4C hawnnaah hian a tul apianga hman atan cheng singkhat leh buhfai bag 2 a hlan nghal bawk a ni.

Khuangpuilam 4C atana hman Govt. Diakkawn High School ah hian mipa 21, Hmeichhia 22 leh Chhuangkua a khunghran ngai, mi 10 awm theihna hmun ruahman a ni a, Wifi thlun zawm tura hmalak mek niin hri kai khunghrante taksa insawizawi duh te tan hmun ruahman sak a ni bawk. Pu Lalremsiama Varte, Secretary, Khuangpuilam VLTF report-a tarlan danin Khuangpuilam vengah hian Home Quarantine lai 43, Home Isolation 13 leh Jordan Home, Sethawn 3C a enkawl lai mi 4 an awm mek a ni.

Dr.R.K.Lalthlamuana, SMO tarlan danin Kolasib district pumah kum 18 chhunglam mi 58,384 awm mek anga chhut niin heng zinga 15000 vel chu Covid-19 Vaccine dose engmah la la ve lo anga chhinchhiah a nih thu a sawi a, Vaccine lak pawimawi zia inzirtirna uar leh zual a kalpui a tul thu a sawi bawk a ni.

Supply Minister Pu K.Lalrinliana hian Khuangpuilam 4C, Vengthar 4C, Diakkawn 4C, Project Veng 4C, Venglai 4C leh Hmar Veng 4C-ahte hian a tul apainga hman tur cheng singkhat leh buhfai bag 2 theuh a hlan a ni.

Minister hian Khuangpuilam 4C hawnna hun a hman zawh hian DC Conference hall, Kolasibah Bairabia Rail-fed Oil Depot bun tumna hmun a ram neitute nen thutkhawmna hun a hmang bawk a ni.