No.1285/2021-2022
Kolasib dated 7th July 2021: Vawiin chawhnu khan Circuit House Conference Hall-ah Food, Civil Supplies and Consumer Affairs Department Minister Pu K.Lalrinliana hovin ramri thawmțhat dan tur leh Kolasib district-a 4C din chungchang sawi hovin țhutkhawmna neih a ni a, Dr.H.Lalthlangliana, Deputy Commissioner, Dr.Lalhlimpuia, Chief Medical Officer, Dr. Doris Lalnunmawii Sailo, District Medical Superintendent leh Joint VLTF, Kolasib town hruaitute an tel a ni.
Minister Pu K.Lalrinliana chuan hrileng dona kawngah ruahmanna famkim leh sawisel bo neih a har thu sawiin ram changkang leh hausa zawkte pawhin kalphung hrang hrang enchhin a hun an hman thin thu a sawi a. Kolasib district chhung a ruahmanna kalpui tawh dan enletna leh rilru inpawh tak chunga sawihona hun buatsaih theih a ni chu lawmawm a tih thu a sawi. Inkaihhruaina tha ber hriat a har rualin mahni phak tawk theuh a fimkhur tur leh midangte pawh fimkhur tur a zirtir zel a pawimawh thu a sawi a, engtianga rei nge hri a len dawn tih hriat a nih loh avangin thui tak thlir chunga, rilru inpawh tak chunga rorel hona neih chu a pawimawh thu a sawi bawk a ni.
Kolasib district hmun hrang hranga ramri hrul a Mizoram Police duty-na hmun thawmthat dan tur te sawi niin Aitlang, Vairengtea duty post-a eng chhit nan Minister hian Generator leina tur Cheng Singnga DC hnenah a hlan a, Duty-na hmun panna kawng tha siam dan turte sawi nghal a ni. Zophai, Bairabia hmalakna țhenkhatte sawi niin ramri hrul a inkal pawhna tha a awm theih nana Zophaia lei dawh mek chu chak zawk a kalpui a nih theih dan tur sawi a ni bawk.
Dr. Lalhlimpuia, CMO chuan Mizoram sawrkar ruahmannain 3C leh 4C a dah tur Oxygen Concentrator 11 a lo thlen mai tur thu a sawi a. T.N.T, Khuangpuilama awmte endik runpui vawiin hian kalpui mek a nih thu a tarlang bawk a ni. CMO chuan Kolasib district chhungah Vairengteah 4C kalpui țan a ni a, VLTF nen țangkawp a 4C din hian kawng tam takin a awmte tan a hlawk zawk dan leh sawrkar a chhawk zangkhai theih dan sawi zauna hun a hmang bawk a ni. Dr. Doris Lalnunmawii Sailo, DMS pawhin he hunah hian Kolasib district-a Covid-19 test kalpui dan tlangpui leh hnuchhui hna kalpui dan a tarlang a, District Hospital, Kolasiba inentir tur lo kalte endikna atangin, ni 8 liam ta thleng a hri kai hmuh chu za zelah 6.21 a nih thu a sawi bawk a ni.
Minister Pu.K.Lalrinliana chuan a bial chhung VLTF-ten hrileng dona kawng a a țul apianga an hman atan cheng singkhat țheuh leh buhfai bag 7 țheuh, Joint VLTF hruaitute kutah a hlan nghal a. Duty-te mamawh hmanraw hrang hrang sem chhuah turin a ruahman sak thu leh Oxygen Concentrator 2 pawh lo thleng mai tur a beisei a nih thu a sawi bawk a ni.
Attachment
- Loading attachment...
