Food, Civil Supplies & Consumer Affairs Minister Pu H.Rohluna chuan nimin khan Thenzawl, Sialsuk, Hmuifang leh Aibawk Supply kudam te a hmunah a tlawh a, kudam a buhfai dinhmunte a enfiah bakah kudam hrang hrangin harsatna an tawhte a enfiah nghal bawk. Hei bakah hian kar kalta inrinni khan Chhingchhip leh Chhiahtlanga Supply kudam te pawh a tlawh bawk.

Minister chuan kudam hrang hrang a tlawhnaah hian kudam enkawltute chu diktak leh rinawm taka an hna thawk turin leh mipui rawngbawltu an nihna hre reng turin a chah a, thingtlang khaw hrang hranga miretheite eitur buhfai hralh ruk ching an awm thin chu pawi a tih thusawiin miretheite chanai lo chheprelh thin te chu man an nih chuan na taka hrem an nih tur thu a sawi a, kudam hnathawkte pawh buhfai an dawn leh semchhuah chung changah pawh fimkhur tak leh dik taka ti thin turin a chah nghal bawk a, ration card diklo tam lutuk chu buhfai hralh dikloh nachhan pakhat anih thu sawiin ration card diklo te zawng chhuaka a siamtha turin Sawrkarin theih anga chakin hma a lak mek thu a sawi bawk. Thawktuten kudam enkawl chungchanga harsatna an tawhte pawh atakin a enchianpui bakah kudam te pawh a theih dan ang anga thuam that a tul thu a sawi bawk. Heng kudam hrang hrangah te hian tun dinhmunah chuan buhfai dinhmun hi a tha tawk a ni tih a thawktuten an lo hrilh a ni.

Kudam hrang hrang a tlawhna ah hian khawtlang aiawh ten an khawtlangin buhfai, chini, khawnvartui leh eirawngbawlna gas chungchanga harsatna an tawh te an lo hrilh a, Minister chuan heng harsatna te hi chhinchhiah sakin lo zirchian a a theih anga chaka hma lak sak a tum thu a hrilh a, mipuite leh sawrkarin rilru hmun khat pu a tan an lak tlan a ngaih thu sawiin khawtlang hruaitute tawiawmna pawh a ngen nghal bawk a ni.