1985/2022-2023
Aizawl, 19th September, 2022 : Food, Civil Supplies & Consumer Affairs Minister Pu K. Lalrinliana chuan vawiin chawhnu khan Govt. Muanna godown, Zuangtuia Digital Weighbridge (Lirtheiin an thil phurh rih zawng bukna) bunna tur a endik a. Minister hi Pi Ramdinliani, Secretary, FCS&CA leh Pu Andrew H. Vanlaldika, Director, FCS&CA bakah Supply department official pawimawh ten an tawiawm a ni.

Supply Minister chuan Zuangtui kudama weighbridge hmanlai kum 2020 April thlaa a chhiat khan khawl thar leh tha zawk, hman nuam leh awlsam digital weighbridge a thlak tumin ruahmanna an siam tih sawiin COVID-19 hripui leng avangin harsatna kan tawk a, kan duh aiin kan inpeih har ta a ni, a ti a. Zuangtui a supply kudam chu hmun dangah sawn chhuah tum a nih thu leh a hmun tur pawh tihfel thuai a nih a beiseiawm tawh tih a sawi a ni.

Supply minister chuan retailer te hnenah buhfai bukna tur electronic weighing scale pek vek an nih thu sawiin retailer thenkhat patla pangngai hmang thin an awm bakah buhfai buk lem lova suak thin an awm tih report an dawn thu a sawi a, sawrkarin a ngai thutak hle tih sawiin electronic weighing scale an kawl lai a chhia emaw, hman tlak loh a nih chuan supply department hotute hnenah hriattir vat tur a ni, a ti a. Dan lo anga buhfai buk an awm tih finfiah a nih chuan na taka hremna lek a nih tur thu sawiin, mipuite pawhin an chanvo dik tak an chan theihna tur a ni tih hriaa dik lo taka tite chu report thin turin a chah a ni.

Ration buhfai mipui hnenah dik taka pek chhuah a nih theih nan FCS&CA Department chuan buhfai phurtu lirthei (truck) chawpa buhfai bukna tha leh awlsam, Digital Weighbridge pahnih (2) GMG Zuangtui ah dah turin hma a la a, hemi atan hian sawrkarin SEDP hnuai atangin fund pawh a pe tawh a ni. Tunhma n GMG Zuangtui ah hian Weighbridge hi hman a ni reng thin a, April, 2020 atang khan Weighbridge hman lai chu a chhiat tak hlauh avangin a hman theih ta lova, hemi avang hian a thar dang dah leh vat tura hmalak a ni. GMG Zuangtuiah hian a tirah Digital Weighbridge 60 MT capacity pahnih (2) dah tum a nih laiin a hmunhma hi a chep deuh avang leh mamawhna a awm ve tho avangin Weighbridge pakhat zawk hi PDC, Luangmual, Lunglei ah dah ve tura ruahman a ni ta zawk a ni. Weighbridge bunna tur atan hian Civil Foundation bakah Control rooms pawh buatsaih fel an ni tawh a ni. SEDP hnuai atanga fund hmuh dan chu a hnuaia mi ang hi a ni:

1) 2019-2020 FY - Rs. 29,00,000/-
2) 2021-2022 FY(Addl.) - Rs. 2,57,000/-
Total - Rs. 31,57,000/-

Weighbridges te hi Leotronic Scale Private Limited, Amritsar, Punjab ten an rawn supply a, Weighbridge pahnih (2) man bik Rs. 21,68,840/- atang hian 95% pek tawh niin a balance 5% hi Weighbridge hawn a nih hnuah Leotronics te hi pek leh tura inrem a ni. Installation, Electrification, Maintenance etc. te pawh an rawn hma vek dawn bawk a, hemi atan hian weighbridge man bak fund dah sa a ni.

Tun dinhmunah GMG Zuangtui leh PDC Luangmual, Lunglei a Weighbridges bunna atana Civil Foundation leh Control rooms te peih an nih tawh avang hian Leotronic hotute pawh Installation leh a tul dangte a rang lama rawn ti tura ngen leh hriattir niin Branch Manager.Leotronic Scale,Guwahati Branch chuan tun thla chhung ngeiin khawl an rawn bun (installation) tur thu a sawi a ni.