2812/2026-2027

Mamit dated 26th October 2026: Northeast Gas Grid Project kaltlanga Indradhanush Gas Grid Limited (IGGL) hnuaia Panisagar – Aizawl Pipeline, km 119.450 a thui thlunzawmna tura hmalakna chu Pu B.Lalchhanzova, Minister, Food, Civil Supplies & Consumer Affairs Department chuan an hnathawh mekna hmun, Tuidam, Mamit district-ah a tlawh a. Pu Ravi Dadich, IAS, Secretary, FCS & CA, Pu R. Lalthazuala, Director, FCS& CA, Pu Andrew Vanlaldika, Addl. Secretary, Pu Suvigya S Chandra, IAS, Deputy Commissioner, Er. PC David Lalrinliana, Sr. EE, PWD, NH Division-1, Indradhanush Gas Grid Limited leh Executive Director, Metallurgical and Engineering Consultants (India) Limited (MECON)-te an tel a ni.

Supply Minister Pu B.Lalchhanzova chuan khawvel ram hrang hranga buaina thlengin a nghawng zingah eirawngbawlna LPG ngei pawh heng avang hian hun engemaw chen chu Mizoramin harsatna a hmachhawn phah thu a sawi a. Hemi avang hian in chhung eirawngbawlna chu gas pipe connection a thlunzawm a nih theih nan Northeast Gas Grid Project hnuaiah India hmarchhak State hrang hrangin gas pipeline connection an neih theih nan Cheng Vbc. 9265 bawr vel sengin Gas pipe km 1656 a thui phum hna thawh mek a nih thu a sawi a. Mizoram pawh Tripura Natural Gas Company Limited nen thlunzawm turin IGGL ten hma an lak mek thu a sawi a. He ruahmanna hi Mamit district leh Aizawl district-a kalpui hmasak tur niin March - April 2027 chhungin Mamit khawpui a luh hman beisei a nih thu a sawi a. Aizawl, Sihhmui pawh March -April 2028 hmaa thlunzawm hman beisei a nih thu a sawi.

Pu B.Lalchhanzova chuan Mizoram chu Gas pipeline hmanga thlunzawm a nih chuan ram danga kan hmuh thin, CNG hmanga lirtheite tlan tir theih a nih tur thu a sawi a. Hei hian tuialhthei mamawhna nasa takin a tih hniam a beisei thu a sawi bak ah, LPG mamawh ang tawk hmuh loh avanga eirawngbawlna kawnga harsatna awm thin chu Gas pipeline connection hian a sutkian a beisei thu a sawi a. A rang thei ang bera Mizoram mipuiin gas pipeline connection an hman ve theih nan IGGL hotute chu tan la turin a chah a, he project tih puitlinna tur hian a tul apiangah Mizoram Sawrkar chuan puih an inpeih reng thu a sawi a. Sawrkar department hrang hrangte, District Administration leh khawtlang mipui pawhin, ram tana thil tha, ro tling nei tur hian tanrualna leh thawhhona tha neih a pawimawh thu a sawi bawk a ni.

Vawiina Supply Minister-in Mamit district-a IGGL hmalakna a endikna ah hian Tuidam khaw pawhna kawng avanga harsatna awm chu a hmunah a endik a. Gas pipeline phumna tur kawng km 1.5 vela thui chu hmun engemaw zah ah zauh belh a tul thu sawi niin, he kawng thawmthatna tura ruahmanna awmsa nen a insut buai loh nan IGGL leh PWD lam hotute chuan thawhho dan tur an sawi nghal bawk a ni.

Northeast Gas Grid Project kaltlanga Indradhanush Gas Grid Limited hmalakna hnuaiah hian Tripura Natural Gas Company Limited (TNGCL) leh Aizawl khawpui chu Gas pipeline a thunzawm tura ruahman a ni a. Pasinagar – Aizawl inkar Km 119.450 ah hian gas pipeline 12 inches diameter a lian, 7.14 mm a chhah phum tur niin Sectionalizing Valve Station 6, Dispatch Terminal 1 leh Receiving Terminal 1 a awm dawn a ni. Pipeline hi Tripura State chhunga khaw 6 paltlangin 15.105 Km a thui a awm anga, Mizoram chhunga khaw 20 paltlangin 104.345 Km a awm bawk ang. Pasinagar – Aizawl pipeline thlunzawm hna hi IGGL hnuaiah M/s Cortech International Limited-ten an thawk a, he Project thawh nan hian Northeast Gas Grid Project hnuaiah Rs. 491 Crore ruahman a ni a.