Food, Civil Supplies & Consumer Affairs Minister Pu H.Rohluna chuan Kar kalta Zirtawpni khan a zin haw pahin Vairengte a Supply Department check gate leh Enforcement check gate te tlawhin gate duty te hnenah Supply phur motor Vairengte check gate rawn paltlang thinte tan harsatna siam lo turin leh harsatna an tawh chang pawha lo tanpui thin zawk turin a hrilh a, Mizoram mipuite mamawh tak tak rawn phur lut tute an ni tih hria a, an thiltih dik leh diklohin Mizoram pum a nghawng vek thei ani tih hria a, hnam hmangaihna rilru pu chunga dik tak leh rinawm taka hna thawk turin a chah bawk.

Minister hi a zinna a Ramnagar FCI kudam a tlawhnaah a thawktuten Mizoram chhunga check gate hrang hrangah an chhiah pek tur bak pawisa khawn anih thin thu leh hei hian harsatna a siam sak thu an sawi a, Supply thiar hi a hlep a that loh laiin hetianga khawntesep a awm reng chuan Truck driver ten Mizoram kal an hreh telh telh dawn tih an lo hrilh a, Minister pawhin a theih ang anga hma lak a tum thuin a chhang nghe nghe a ni.

Minister hian Vairengte Supply Kudam pawh tlawh nghalin buhfai dinhmunte leh an hnathawh dante a enfiah nghal bawk a, a zin haw pah hian tlai khawthim dawnah Bilkhawthlir dai kawngsira Gas phur (Gas Tanker Truck) pahnih lo dingte chu endikin pakhat zawk a IOC seal awm lo chu a ngaimawh thu sawiin Motur thlalak leh numberte a la a, Aizawl thlen hnuah IOC Gas Depot hotute hnenah thu zawhfiah a a tul anga hma lak anih tur thu Gas Driverte chu a hrilh a, mipui chanai Gas tihchingpen ching chu Sawrkarin a dim dawn lo tih a hrilh nghal bawk a ni.