Nimin tlai khan Food, Civil Supplies & Consumer Affairs Minister Pu H Rohluna leh Indian Oil Corporation (IOC) Guwahati hotute chu a Office Chamber-ah an in kawm a. Inkawmnaah hian tunlai a eirawngbawlna gas dinhmun chungchang an sawiho a, gas dinhmun tih ziah awm nana kawng awm thei ni awm a an hriat te chhipchiar takin an sawiho bawk. Meeting ah hian Minister chuan Mizoram in gas a mamawh zat a hmuh thei loh avangin harsatna a tawh chhungchang te a hrilh a, gas harsatna tih kiam nan theitawp chhuah sak turin a ngen nghal bawk a ni.
IOC hotute chuan Eirawngbawlna Gas chu Mizoram-ah chhuah nilovin ram pumah a harsat thu an sawi a. International market a LPG a van avangin IOC leh oil company dangte chuan LPG an mamawh zat chawkluh tur an hmuh lo a. Hei hian nasa takin Ram pumah harsatna a thlen thu an hrilh a. Saudi Arabia tunhma a LPG gas hralh tam berte zinga ami chuan khawvel pum huapa tuialhthei sawngbawlna (Petrochemical Company) lian tak an sak mek avangin LPG an hralh chhuak mang ta lo chu India a gas harsatna thlentu lian ber nia an hriat thu IOC lam hian an sawi. Ram in LPG a mamawh Metric Tonne nuai 7 vel a ni laiin ramchung a siam leh ram dang atanga chawkluh belhkhawm chu Metric Tonne nuai 6 vel chhauh a ni.
Hmarchhak biala oil refinery pali awmte – Numaligarh Refinery Limited (NRL); Digboi Refinery; OIL Refinery Duliajan leh Guwahati Refinery te chuan tunhnai khan technical harsatna leh kangmei te an tawrh avangin Refinery te hian gas mamawh zat an siam theih loh thu IOC hotute te hian an sawi a. NRL chu April ni 7 khan a kan avangin Refinery chu khar lailawk a ni a. NRL hi Hmarchhaka a Bulk LPG siamchhuaktu lian ber niin thla tin Bulk LPG Metric Tonne 4000 an siamchhuak thin a. IOC in he Refinery hi June ni 15 lamah hawn anih leh an beisei thu Minister hi an hrilh a. Digboi Refinery pawh April ni 2 atang khan April ni 16 2012 thleng khar a lo ni a. Tin OIL Refinery Duliajan pawh thla khat hnu velah Refinery enfel hna(maintainance) thawh anih dawn avangin ni 15 vel chu khar a nih dawn thu an sawi bawk. West Bengal-a Haldia Port a Ram dang atanga Bulk LPG chawkluh a thlen tlem em avangin Hmarchhak pumah gas indaih lohna hi hei hian a belhchah thu an sawi bawk a ni.
Ram pum bial hrang hrang Gas indaihlohna(backlog/overall shortfall) tarlangin, Mizoram chu a zaiawm pawl anih thu meeting ah hian an sawi a. IOC sawi dan chuan May ni 3, 2012 thlenga gas indaih lohna chu hetiang hi a ni : Northern Region – 10828 MT; Western Region – 6780 MT; Southern Region – 36313 MT leh Eastern Region – 11677 MT. Eastern Region a backlog tamna ber chu Assam (5905 MT) niin Mizoram backlog chu 500 MT a ni ve thung. IOC chuan ngun leh uluk takin indaihlohna hi a vil renga, June thla laihawl vel chuan gas dinhmun a that an beisei thu an sawi bawk a ni.
Minister chuan Mizoram in gas a mamawh metric tonne 1650 velah chhut chu tlem tiin hei hi metric tone 2000 vel tal ah pun chho turin IOC hotute a ngen a. Ram pumah gas indaih lohna vangin kumin April thla phei kha chuan IOC in MT 1240 chhauh an supply a, February khan MT 1693 leh March khan MT 1873 supply anih thu meeting ah hian tarlan a ni. Gas phurtu ten gas an tihchingpen ven nan LPG Stock Transfer chu Borkhala LPG Bottling Plant atanga Mualkhang LPG Bottling Plant ah dah vek chhungchang chu IOC lam chuan lo enfiah an tiam a. Minister in Mizoram carrying contractor ten Borkhola LPG Bottling Plant a harsatna an tawh chhungchang Minister in a sawi chu IOC lamin enfiah an tiam bawk a ni. Baktawng khaw mi 21, Aizawl Gas Agent hrang hranga Connection nei, Seling-a Jamadarthangi LPG Distributor a sawn dilna leh Khamrang khaw mi 88 te connection sawn dilna chu IOC chuan tihlawhtling turin Area Manager chu an hriattir nghal a.
Meeting-ah hian Mualkhang LPG Bottling Plant tihlen leh tihchangtlun chungchang an sawiho bawk a ni. Meeting ah hian IOC Guwahati atangin Pu A Panda, Executive Director, Assam Oil Division; Pu P Dey, General Manager, North East Integrated State Office; Pu A C Sharma, Deputy General Manager (LPG) leh Pu M K K Peggoo SDRSM, Silchar te an tel a. Minister hi Pi M Zohmingthangi IAS Food, CS &CA Secretary leh Supply Department senior officer dangten an tawiawm a ni.
Nimin tlai vek khan IOC hotute te hian Aizawl Club-ah LPG Distributor te an kawm a. Tukin zing khan Chief Minister Pu Lal Thanhawla chu a Bangla-ah an hmuh hnu in, IOC hotute hian Mualkhang LPG Bottling Plant an tlawh bawk a ni .
