2464/2023-2024

Aizawl, October ni 24, 2023: Inthlanpui lo awm turah voter tam thei ang berin vote an thlak theih nan a hmalakna hmanrua pakhat atan tukin khan Mizoram Cycling Association (MiCA) te nen tangho in SVEEP (Systematic Voters Educatipn and Electoral Participation) Aizawl District buatsaihin Cycle Rally neih a ni a. Mi 85 bawr velin thirsakawrin Vanapa Hall kawt atangin AMC Office Thuampui thleng an tlan a ni.

Aizawl DEO Pu Nazuk Kumar, IAS chuan rally tan hma hian thu sawiin, India ram chu mipui rorelna democracy ram lan nih angin, ram inrelbawlna chu mipui kutah a innghah thu leh, chumi atana hmanrua chu vote thlak a nih thu a sawi a. Chu vote hlutna chu hre thar leh a, ram inrelbawlna atana kan mawhphurhna chu hlen theih turin kalkhawmte chu a chah a ni.

He rally ah hian tun tum inthlanna atana Police Observer a ruat Pu Ajay Kumar Nand pawh a tel ve a ni.

Inthlanpui awmze nei tak leh mipuiin an dikna chanvo vote thlak an tihhlawhtlin ngei theih nan SVEEP chuan kawng hrang hrangin hma a lo la tawh a. Inzirtirna leh inhrilhhriatna tam tak lo kalpui tawhin, hmachhawp engemawzat a la nei bawk a ni.