No.2429/2020-2020

Vawiin khan Swachh Bharat Mission (Grameen) hnuaia Covid-19: Sanitation Package Flag Off Programme chu Deputy Chief Minister Pu Tawnluia pisa-ah hman a ni a, he hun hi Public Health Engineering Department Secretary Pi Sangchin Chinzah in a kaihruai a ni.

Deputy Chief Minister Pu Tawnluia chuan tunlai khawvelin a buaipui em em Covid-19 hrileng dona kawngah mipui leh sawrkarin theihtawp chhuahin hma a la in ke a pen zek a, India ram sawrkar pawhin a ram mipui te chhawmdawlna kawngah hian theihtawp a chhuah mek zel a, chutiang bawkin State sawrkar te pawh kawng hrang hrangin theihtawp chhuah turin a ti a; chung zinga hmalakna chikhat-ah Sanitation workers te hi hrileng laka an invenna tur ngaihtuah sak tulin a hria a ni, a ti a. Sanitation workers te hi frontline workers an nihna ang ngei a invenna hmanrua ngaihtuahsak hi tha leh tul a ni, tiin a sawi. Government of India in Covid-19 hrileng avang hian Faina (Sanitation) lama hnathawktute hi frontline workers annih avangin a ngai pawimawh em em a. An hnathawhte Covid-19 hrileng laka him taka an thawh chhunzawm theihnan Swachh Bharat Mission (Grameen) hmalakna hnuaiah invenna hmanrua ngaihtuahsak tura State sawrkar a hriattir angina PHE Deparment chuan thingtlang khaw 692-a village WATSAN committee te hnena semchhuah turin hmanrua chi hrang hrang a buatsaih a ni, tiin a sawi bawk a ni.

Deputy Chief Minister chuan heng khaw 692 zingah hian khua 77-ah 'Inkhunghranna' (Quarantine Centre) siam ani a. Heng hmun a hman tur bik atan hian PPE Gown, Protective cap, Protective shoe cover, Examination glove leh Hand Sanitizer te pek tura ruahman a ni a, khua zawng zawnga Swachh Bharat Mission (Grameen) hnuaia Sanitation hna thawktute tan Mask (hmaituamna) leh Disinfectant pekchhuah tura ruahman bawk a ni, a ti a. Hetiang ruahmanna hi Mizoram mipuite an him tlanna atan leh sanitation workers te him zawk nana hman turin a tlangzarh a, hemi tihhlawhtlinna atana bungrua mamawh zawng zawng khaw 692 a semchhuah tur hi lawm takin a vailiam tih a sawi.

Swachh Bharat Mission (Grameen) hnuaia Sanitation lam kaihhnawiha thawktute (Village WATSAN Committee leh Swachhagrahi) te hi Covid-19 hrileng avangin invenna hmanrua theih ang ang a ngaihtuahsak turin, State Sawrkar hnuaia Rural Sanitation changtu (PHED) te Govt. of India in April, 2020 khan a rawn hriattir a. Chumi bawhzui chuan Mizoram chhunga SBM(G) hnuaia thingtlang khaw hrang hrang 692 a hnathawktute tan invenna hmanrua a hnuaia mi ang hian remchhuah tura buatsaih a ni.

 Heng hmanruate hi Village WATSAN Committee kutah hlan a ni ang.