No.3019/2021-2022

Aizawl, the 17th November 2021:Mizoram Cleanliness Competition, 2021 hman mekah nimin 16.11.2021 (Thawhlehni) khan Swachh Bharat Mission hnuaia Local Ambassador ten Aizawl Municipal Corporation Auditorium-ah Meeting pawimawh tak an nei a. Pu H. Zonunsanga, Executive Councillor chu khuallian a ni.

Executive Councillor Pu H. Zonunsanga chuan faina leh thianghlimna kawnga hma kan sawn theih nan mipui zingah awareness a tam thei ang ber kalpui a tul, chutah tana mawhphurhna lian tak neitu Ambassador te chu thahnemngai taka ke pen turin a chah a. Kohhran leh NGO te thawhpui thiam turin a sawm a ni. Khuallian chuan Mizoram Cleanliness Competition, 2021 ah Aizawl khawpui tan Ward fai inelna neih tur a ni a, mahni Local Council theuhah theihtawp chhuaha tan la theuh turin Local Ambassador te a chah bawk a ni.

Municipal Commissioner Pu K. Laldingliana chuan thusawiin Aizawlin faina leh thianghlimna kawngah tunhma aiin nasa takin hma a sawn a, a hmun lova inthiar awm tawh lohna khawpui (Open Defecation Free City) ah puan a ni tawh, a ti a. Open Defecation Free Plus dinhmuna kai turin vantlang inthiarna fai leh thianghlim chu tehfung pawimawh tak a ni a, mahni area theuha vantlang inthiarna vawngfai turin Local Ambassador te a chah a ni.

Meeting-ah hian Pi Veronica Vanlalhriatpuii Colney, Assistant Architect & SBM Addl. Nodal Officer chuan Local Ambassador te hmalakna tur leh mawhphurhna hrang hrang Presentation hmangin a entir a ni.