India ram pum huap khawpui fai inelna Swachh Survekshan 2018 hmachhawn tura inpuahchahna kal zelah tukin zing dar 6:30 khan UD&PA Department, Lunglei buatsaihin faina kawngzawh ‘Walkathon’ neih a ni a. Pu Benjamin Lalzama, Additional DC, Lunglei District chuan faina kawnga sawrkar hmalakna hrang hrang ti hlawhtling tur chuan mipui mimir ten fai duh tak tak na thinlung an put a tul a ni tiin khawpui fai inelna Swachh Survekshan 2018 hmachhawn tura inpuachahna kal zelah mipuite thawhho puiah sawmin Swachh Survekshan 2018 Walkathon chu a vailiam a.

Pu Andrew Lalhruaia, DUDO, Lunglei pawhin report pein Swachh Survekshan 2018 inelna atan ngawrh taka an inbuatsaih chhoh dan a sawifiah a. Khawpui chhung hmun hrang hranga tuiluankawr tihfai mek a nih bakah retaining wall hnawih var (white washing), vantlang bawlhhlawh bawm dah, khawpui phiah fai leh then fai hna te kalpui a ni a. Faina chungchang sawi tura thlanchhuah ‘Speaker ’ ten zirna in leh kohhran hrang hrang an tlawh kual mek a ni.

Vawiin walkathon-ah hian sawrkar official, tlawmngai pawl aiawhte, zirna in hotute leh mipui thahnem tak kalkhawmin Lunglei AOC atangin Mizofed kawtzawl, Venglai thleng faina kawngzawh an nei a. Hun tawp khar nan kalkhawmte hian Faina Thutiam an sawiho bawk.

Swachh Survekshan 2018 hi sawrkar laipui hmalakna niin India ram puma Statutory Towns 4041 te faina leh thianghlimna kawngah an inel dawn a, Sawrkar laipui atanga endiktuten mark an pek atangin Khawpui fai Ranking siam a ni ang.