Swachh Survekshan Grameen 2019 Awards (SSG 2019) hi Department of Drinking Water and Sanitation, Ministry of Jal Shakti hnuaiah 14th August - 30th September 2019 chhung khan neih a ni a. He programme-in a tum ber chu thingtlang khuate faina lama inelna a ni.

He inelna atan hian tehfung hrang hrang hman a ni a, field survey leh online report-te atangin India rampuma state leh district titha te thanchhuah a ni. Field Survey ti tur hian Govt. of India chuan 3rd party inspection team IPSOS Pvt. Ltd. India a hmang a, India ramchhunga thingtlang khaw hrang hrang 17209 an endik a  ni. He intihsiaknaah hian Mizoram chuan category pahnih : (1). Smaller State & UTs 12 zingah leh (2). North East Zone-ah te pakhatna (first position) dinhmun a luah a. India rampum huapin pathumna (third position) a ni bawk a ni.

Heng bakah hian india rampum huapa district 683 atanga tithate thlanchhuah leh an ni a. North east Zone-ah : Pakhatna - Kolasib district, Pahnihna - Serchhip district leh Pathumna - Aizawl district te an ni a. India rampum huap ang chuan Kolasib district hi 33-na niin, Serchhip district 53-na, Aizawl district 60-na, Champhai district 82-na, Lunglei district 86-na, Mamit district 95-na, Lawngtlai district 148-na leh Siaha district 150-na te an ni.

Lawmman sem hun hi World Toilet Day pualin ni 19.11.2019 khan Pravasi Bhartiya Kendra, New Delhi-ah neih a ni a, lawmmante hi Union Minister Pu Sadananda Gowda chuan a hlan a ni.

SSG 2019 hi Swachh Bharat Mission (Grameen) hnuaia hmalaknate tehna a ni a, Mizoramah chuan SBM(G) hi PHE Department hmalakna pakhat a nih angin, SSG 2019 Awards dawng tur hian PHE Department aiawhin Er.H.C.Lalnunzira, Mission Director, SBM(G) hovin District aiawh Er.H.Lallianmawia, Sr.EE Kolasib District, Er.F.Sanglura, Sr.EE Serchhip District leh Er.C.Zothantluanga, EE Aizawl District te an kal a ni.