DIRECTORATE OF INFORMATION & PUBLIC RELATIONS, Government of Mizoram, India

672/2025-2026

Aizawl, the 19th May 2025: Vawiin chawhnu khan Social Welfare Minister Pi Lalrinpuii chuan a Pisa-ah Chanchinbu mite a kawm a. He hunah hian Social Welfare Department Hotute nen Ruihhlo ngaite enkawlna leh nun siamthatna kawngah sawrkar hmalakna, sawrkar dinhmun leh a hmathlir te inhrilhriatna hun hman a ni a. Chanchinbumite hnen atanga zawhna te pawh chhan a ni.

A hnuaia tarlan ang hian SWD kaltlanga Mizoram Sawrkarin ruihhlo ngaite enkawlna - De-addiction & Rehabilitation Centre a kalpui dan leh a kaihhnawih te Social Welfare Minister chuan a sawifiah.

1. Social Welfare Department-in a hriat theih chinah tun dinhmumnah hian Mizoram-ah Ruihhlo ngai enkawlna (De-addiction & Rehabilitation Centre) 46 a awm mek a, heng zingah hian Centre 11 chuan Ministry of Social Justice & Empowerment(MOSJE) atangin Fund an dawng thin a. Chung Fund dawng zingah chuan Director, Social Welfare hnuaia Mizoram Social Defence & Rehabilitation Board(MSD&RB) ten an enkawl Centre 2 (Pisgah Reformatory, Thingsulthliah & Reformation Centre, Champhai) pawh a tel ve a.

Ministry of Social Justice & Empowerment(MOSJE) atanga tanpuina dawng thin ho Centre 11 hi Integrated Rehabilitation Centre for _Addicts (IRCA) tia koh an ni. Anni hian Ministry duan inkaihhruaina mumal tak (Minimum Standard of Care & Support) hmangin enkawlna an kalpui a, Ministry lam ten an rawn endik thin bakah Social Audit te pawh neih thin a ni. IRCA 10 hi khum 15 awmna niin IRCA 1 hi khum 30 awmna a ni a, heng IRCA te hi khum 50 awm thei tura tihlenna tur Concept Proposal SASCI atanga fund turin Planning Department ah thehluh mek a ni.

LISTS OF IRCA's

Sl. No	Name of IRCA	Location	No of Beds
1	Agape Moral Reformation Organization	RopaiaBawk, Chawlhhmun, Aizawl	15
2	Zoram Drivers Ramthim Board – Damna In	Zuangtui, Aizawl	30
3	Social Guidance Agency	PTC Lungverh, Aizawl	15
4	Blessing Home	Sakawrtuichhun, Aizawl	15
5	Jeriko Khualbuk (New Life Home Society)	Durtlang, Aizawl	15
6	Pisgah Reformatory Center	Aichalkawn, Thingsulthliah	15
7	Women Anti Drug Assn. (WADA)	Chanmari, Lunglei	15
8	Reformation Centre	Jail Veng, Champhai	15
9	Thutak Nunpuitu Team	Khuangpuilam, Kolasib	15
10	Faith Home Society	Vengh;un, Chhingchhip	15
11	Calvary Healing Ministry	Siaha Tla 1, Siaha	15

Heng bakah hian Private enkawl Home/Centre -- 25 leh Kohhan te enkawl home/Centre 8 a awm bawk.

2. Jordan Center, Sethawn: Hei hi De-addiction Center atana hman reng thin kha a ni a. Tunah hian After-Care Skill Development Center atan kalpui tura ruahman mek a ni. Kohhran lam ten enkawl hna hi an thawk thei em tih kan zawt mek a, PCI leh BCM te kan bia a, anni hian an kalpui theih loh chuan Sorkar in enkawl hna a chhunzawm ang. Hetah hian ruihhlo ngai sim tawh ten thiam thil chi hrang hrang zir a, eizawnna tur an neih theih nan leh khawtlangah mi pangngai anga an awm ve leh theihna tura ruahman a ni.

3. Sorkar hmalak mekna dangte: District 5 (panga) Drugs De-addiction Center(DDAC) la awmlohna Saitual, Khawzawl, Hnahthial, Mamit leh Lawngtlai ah te DDAC dinna tur hi project proposal Ministry of Tribal Affairs ah thehluh mek a ni a. Multidisciplinary & Research Center hi PISGAH, Thingsulthliah-a dinna tur leh Jordan Center bula Sorkar ram awla De- addiction Center lian zawk dinna tur hi Ministry of Tribal Affairs(MOTA) ah hian thehluh a ni bawk. Heng hi Union Home Minister Pu Amit Shah-a lo kal tuma a hnena ngenna siam anih anga thil kal zel a ni a. Kan Chief Secretary hovin an bawhzui a, MoTA lam hian State Level Executive Meeting ah thlen tura min tih angin Chief Secretary ho hian ni 20.5.2025 hian SLEC hi an thukhawm dawn niin kan lo hria.

4. Mizorama Kohhran 4 (pali)- PCI, BCM, ECM leh LIKBK ten an enkawl mek De-addiction Center te hi After Care Skill Development Course te nei tel nghal tura ngen an ni a. Anni hian hetianga an kalpui theih chuan Sorkarin Grants-in-Aid pek a inhuam a. Hei hi kan Chief Minister in a ngai pawimawh em em a ni.

5· Private Centers : Rinna-a kal kan tih mai, Faith-based Centre ho hi Pathian kohna chhang leh Pathian rinchhana kal an nih angin Sorkar in mawhah kan la lem lo a. Amaherawhchu tanpuina an dil emaw, puihna an mamawh chuan kan pui mai thin. TNT leh Center dangte pawh buhfai leh tul dang an mamawh an rawn sawi chuan Sorkar hian kan pe fo thin. Vanduaithlak takin TBCC hian Sorkar thawhpui hi an duh lo tlat thin a. MSD&RB, Social Welfare Department lam ten Centre-a thawktute training an buatsaih thinah an tel remchang lo fo thin. Kumin February ni 14 khan Director leh Officers, Social Welfare Department te bakah Doctor leh Professional Counsellor ten a hmuna kalchilha a thlawna inentirna leh eitur thahnem tak nen zuk tlawh a counselling leh damlote kawmna hun zuk hman an tum pawh dawngsawng duh loin chawpchilh takin an thulhsan a ni.

6. Accreditation to Govt : Sorkar in dan a neih The Mizoram Drug(Controlled Substance) Act, 2016 leh The Mizoram Drug Treatment cum Rehabilitation Center Accreditation Rules, 2019 (and its subsequent amendments) hnuaiah Drugs De-Addiction Center/Rehabilitation Center te hian Sorkar-ah accreditation an tih vek a ngai tawh dawn a. He dan hnuaiah hian infrastructure, human resource, service, documentation etc ah minimum standards siam niin hetiang zawm lo chu Center din emaw kalpui phal a ni tawh lo ang. Accreditation hi Centre-te tihtawp tumna ngawr ngawr a ni lo a, Centre ten rualkhai zawk leh Ruilihlo ngaiten enkawlna an mamawh ang tak an dawn theihna tura awmze nei taka enkawlna kalpuina tur a ni zawk a ni. Sorkar chuan Centre din a, an theih leh phak ang tawk tawka enkawlna lo kalpuite inpekna pawh a hriatpui tel bawk a, heng Center ding sa te hian awmze nei taka enkawlna an kalpui chhunzawm theih nan kawng hrang hrangin puihna pek a inhuam thung a ni. Sum faia tanpuina bakah service pawimawh bik pek te pawh a tel dawn a ni.

Attachment