Vawiin khan Pu Lal Thanzara, Parliamentary Secretary to Chief Minister chuan Synod Hopital-in Hospital Day puala programme, Nursing School Auditorium-a an buatsaih chu khuallian niin a hmanpui.
Pu Lal Thanzara chuan Mizoram-a Hospital hlun ber Synod Hospital, Durtlang dawmdawiin tia hriat lar in chhumlo chatlo a Pathian hruaina a tihdam rawngbawlna hna kum 85 chhung alo thawk reng ta leh mawlte a bul tan a tun dinhmun Pathian in a hruai thlen hi a ropuiin a lawmawm tak zet a ni, a ti a. He Damdawiin a thawkte chu damlo enkawl bakah ‘tidamtu’ hna an thawk a, hmun danga an thawh ang thawkte ai pawhin an mawhphurhna a sang fe zawk a ni, a ti bawk.
Pu Lal Thanzara chuan he dawmdawiin a thawkte chu an hna hi hna anga en lo a, rawngbawlna anga en reng turin leh hmangaihna nen, thlei bik neilo an mamawh ngawih ngawih tu te hre reng chunga thawk turin a chah a. Synod Hospital-a thawktu hmasa te inpekna, an thawhrimna leh entawntlak rawngbawlna an hnutchhiah te chu chhunzawm zel turin a fuih bawk a ni.
Pu Lal Thanzara hian Synod Hospital Charity Fund atan cheng singnga (Rs. 50,000) a hlan a. Synod Hospital-a pension thlenga thawk te hnenah thilpek Hospital in a buatsaih chu mi 45 vel hnenah a hlan bawk a ni.
He hunah hian Rev. C Rosiama, Hospital BEC Member chuan inlawmna thuchah sawiin, Rev. C. Lalbiakhluna, Sr. Chaplain chuan hunserh a hmang a. Dr. Vanlalruata, Hospital Director in hospital report a pekna ah hospital dinchhuah atanga tun thlenga hospital chanchin chipchiar takin a tarlang a ni. Dr. L. H. Thanga Singson Dy. Medical Superintendent in lawmthu sawina hun a hman zawha programme hi a tiak a ni.
February ni 28, 1928-a, Dr. John Williams (Pu Daka) in helai hmuna damlo a en tan ni leh February ni 28, 1958-a Welsh Mission-in dawmdawiin Synod kutah an hlan ni hriatreng nan Hospital Day hi hman thin a ni.
Synod Hospital-ah hian thawktu 364 an awm mek a, chung zinga mi 13 chu specialist doctor niin midang 16 chu medical officer (MBBS) an ni. Nikum chhung (Jan 2012 – Dec 2012) khan mi 51013 chu Synod Hospital OPD-a, mi 13348 chu Frazer Clinic ah leh mi 7289 te chu Millenium Clinic-ah te an in entir a ni. Damlo 15048 an admit a, major operation 2601 leh minor operation 2756 an khawih bawk a ni. Hemi hun chhung hian an mahni Mobile Medical Clinic kaltlangin mi 7876 an en bakah mi 4077 chu Sawrkar nena tang dun in Mobile Outreach kaltlangin an en a ni. Eye camp vawi 18 an nei a, hetah hian mi 682 te chu an mit an zai sak a ni. Synod Hospital Blood Bank chuan nikum chhung khan hmun 89 a kal chhuakin thisen unit 4570 an la bawk.
Synod Hospital hian mit lamah Sight Saver International leh HIV mainstreaming leh infection control lamah CMAI ten nen tawh dunna an nei mek a. Marapara PHC hi an enkawl mek bawk a ni.
