751/2024-2025

Aizawl, 11th June, 2024: Sports & Youth Minister Pu Lalnghinglova Hmar chuan vawiin khan Helen Lowry Higher Secondary School in Graduation Commencement Program tum 26-na an buatsaih chu khuallian niin a hmanpui a. Hlawhtlinna chang tur chuan ruihhlo leh a kaihhnawih thil laka fihlim a pawimawh tak zet thu sawiin zirlaite chu fimkhur turin a chah.

Minister Pu Lalnghinglova Hmar chuan zirlai hlawhtlinna changte chu a lawmpui thu sawiin, hlawhtlinna tha zawk leh sang zawk an chan zel theih nan taimakna thlah lo turin leh ruihtheihthil laka fihlim turin a chah. Excise & Narcotics Department Minister ni bawk chuan tunhnaia Mizorama ruihtheih thil man a tam zia leh, a khawihtu an tam chhoh zia a sawi a. Vanduaithlak takin Mizoram chu drug route lun tak a awm a nih tak avangin khawtlangah ruihtheihthil leh a kaihhnawih harsatna a tam hle a ni tiin, tun thla nga chhung ringawt a heroin leh ganja kaihhnawih ah Excise & Narcotics Dept. chuan mi 278 an man thu a sawi a. Kum lama la naupang tak takte zingah pawh chin thalo, pawi tham silo anga ngaih atanga intan in, ruihhlo hlauhawm zawkah tam takin an luh phah thin dan te sawiin, fimkhur turin kalkhawmte a chah a ni.

Minister chuan zirlaite hnenah chuan an nakin huna an nih duh leh an nih tum chuan an zir tur subject thlan chungchanga leh an college luhna tur thlengin a inzawm vek avangin tun atanga an tuina leh an thil tum chu ngaihtuah a rilru seng turin a chah a. Mizo zingah IAS, IPS etc. an tlem tawh thu leh, chutianga inhlangkai tur chuan zir nasat a tul thu a sawi a. State sawrkar hnuaia hna awm in a diktu zawng zawng a daih loh avanga sawrkar hna chauh lo, mahni kutkawih hmanga eizawnna tha tak tak a awm thu sawi bawkin LESDE Minister chuan tun atangin zirlaite chu an nakin hun tur thlir chungin, taimak leh tumruhna nen theihtawp chhuah turin a chah a ni.

Vawiina kum 2023-24 chhunga Helen Lowry HSS atanga HSLC leh HSSLC zirlaite pass chhuak te lawmpuina ah hian khuallian hian zirlaite hnenah hian certificate a hlan bawk a ni. Helen Lowry HSS ah hian tun dinhmunah zirlai 1285 an awm mek a ni.