No.2521/2020-2020  

Vawiin ni 27/6/2020 hian Sports Minister Pu Robert Romawia Royte chuan Kawnpui khuaa Infiamna ruhrel thar siam dan turte a hmuna kalin a enfiah a.Kawnpui Football Ground chu standard ground ni pha tur a tihchangtlun a,phul lem phah dan tur te,Kawnpui standard Basket Ball Court leh standard Volleyball Court siam dan tur te a en bawk.Tourism Minister nibawk Pu Robert Romawia Royte chuan Kawnpui tlangdungah riahna hmun tha a awm loh avangin Central Scheme tawp vanga Tourist Lodge sakzawh loh a awm reng chu thar thawh leh tum a ni, a ti.Sports Minister chuan Finance Ministry hnuaiah Externally Aided Project(EAP) sum in principle approval kan neih chhung atangin Kawnpui a Sports complex chu sak anih theih nan Working DPR siam tan a ni, a ti.

Vawiin vek hian Kolasib Stadium thar hmunah Pu K.Lalrinliana Bialtu MLA & Supply Minister leh Pu Lalrinsanga Ralte MLA ten thing an phun a, Kolasib District Football Association te ngennain he football field dunglam metre 5 a tihsei dan tur an thlirho bawk.

Supply Minister leh Sports Minister hian Kolasib Hmarvenga standard Futsal Ground,standard Basket Ball Court leh Volleyball Court awmkhawmna hmun tur a rawtna te an thlirho a, EAP Funding hnuaia khung luh tur a DPR tha tak siam nise an ti.Hemi zawh hian Saidan Veng hmuna SAI Sports Academy dinchhoh tan mek hmun an tlawh leh a, he SAI CENTRE thar tur ah hian Football Academy Field tur phul lem phah zawh tep a ni a,Football bak Discipline 3 dah belh tum a ni a, a senso leh zirlaite enkawlna zawng zawng pawh Central Sorkar hnuaia SAI tum vek tur a nih thu Minister chuan a sawi.He SAI Academy Field a phul lem hi FIFA tested vek niin an sak zawhah pawh FIFA in a rawn test leh tur a ni a, FIFA certified Field Mizorama awm hmasa ber tur a ni.Tourism Minister nibawk Pu Romawia Royte chuan Kolasib Tourist Lodge chu a hlui tawhin a him tawh lova, a building hlui chu thiat vekin sak that tum a nih thu a sawi bawk.

Sports Minister hian Vairengte pawh tlawhin Sports Training Centre dinna hmun tur te a enfiah a,Vairengte chu Serlui Biala khawlian ber a nih avang leh khaw lum hmun a nih avangin Sorkarin sports training-na hmun tha ruahman a tum thu a sawi a.”2018 MLA Election dawn khan Vairengteah keimah ngei lokalin “MNF in Sorkarna kan siam chuan Vairengteah Sports Training Centre kan din ang” ka ti a,chumi tihhlawhtlin ngei tum chuan Vairengteah ka lokal a ni” Sports Minister Pu Roberta chuan a ti. Serlui B tuikhuah behchhanin Tourism project pawh siam mek anih thusawiin Water sports facilities changkang tak tak siam tum a ni, a ti.

Vairengte Joint VLTF te nen inkawmna neiin Minister chuan Mizoram dai theuva humhimtu pawimawh te zinga mi in ni, tiin theihtawp an chhuahna leh hah leh hrehawm an tawrhna zawng zawng chu fakawm a tih thu a sawi a, ram tan a lo tang zui zel turin a fuih a ni.Pu Roberta chuan Sorkar budget ah hmasawnna hnathawhnan chauhva hman theih chi a awm a,a sum petu Central Sorkarin a hman hun chhung tur nen lam a bituk te anih thin avangin Mizoram Sorkarin hmasawnna hnathawhna tur chi sum a hman zung zung a tul a,chu chuan mipui tan sum harsatna engemaw chen a phuhruk dawn bakah installment dang a hnukchhuak bawk ang, a ti.Vairengte Joint VLTF tan Rs 50,000/- leh Sanitizer Litre 40 a pe bawk.

Minister hian Vairengtea Covid screening point pawh tlawhin Doctor leh Nurse duty-te nen an inkawm a, an harsatna sawite chu Health Minister a sawipui nghal tur thu a hrilha, an tlawmngaihna fakin theihtawp chhuah zui turin a fuih bawk.Screening point a Duty-te thingpui innan Rs 10,000/- a pe bawk.

Sports Minister hian Bilkhawthlir a sports hmunhmate a tlawh bawk a ni.