No.320/2020-2021
Aizawl, the 14th April 2020: Nimin khan Task Group on Animal Husbandry & Veterinary Services and Fisheries Department te chuan an chairman Pu C Lalpeksanga, Secretary Animal husbandry & veterinary department, hovin meeting vawi thumna an nei a. COVID 19 Lockdown chhunga thil thleng hrang nrang te an thlir ho a. Inkharkhip (Lockdown) chhung leh a hnu lam zela sa, artui, bawnghnute, sangha leh ran chaw lama harsatna a awm loh nana ruahmanna hrang hrang an siam AH & Vety department leh Fisheries department ten an bawhzui dan chu tha tawkhat viau in an hria a, lungawi thlak an ti. He meeting ah hian sangha hralhna man bituk thu sawi ho a ni a. Mizoram chauh pawh ni lo, ram pumpuiin harsatna kan tawh mek laia, sangha hralhna rate in san lam a pan dawn ni a lang hi Task Group chuan tha a ti lo va, sangha mipui hnena hralhna hi Kg 1-ah Rs 300 aiin tih san loh ni se tiin a rel a. Fisheries department chu hemi thu ah hian order chhuah nghal tura hriattir an ni. Order bawhchhia an awm chuan Disaster Management Act hnuaiah dan anga hma la nghal turin Fisheries department chu inbuatsaih nghal se an ti.
Inkharkhip (Lockdown) chhung hian Sailulak khua a sial te chu chinghne rual (Asian Wild Dogs -Dhole) in vawi engemaw zat an bei a, se no 10 chuang seh hluma an ei zawh sak bakah a puitling pahnih na takin an hliam bawk a. Task Group chuan hei hi a ngai pawimawh hle a. Sial vulh tute chhawmdawl dan tur leh chinghnia laka sial ven him an nih theih nan hma lak nghal tul a ti a. Animal Husbandry & veterinary department chuan E Lungdarah stakeholders zawng zawng, RuRBAN project staff, FOCUS Project staff, Village councils leh Sailulak leh Leng khua a sial vulh tu zawng zawng te ko khawmin E Lungdar BDO kaihhruaina na hnuaiah meeting buatsaih nghal tura hriattir a ni a. BDO hovin sial vulh tute chhawmdawl dan tur leh sial venhim dan tur ruahmanna siama a theih dan ang anga hma lak nghal ni se an ti.
Inkharkhip chhunga mipui mamawh sa chi hrang hrang a khaih lak loh nan leh ran vulh tute pawhin a hun taka an ran an hralh theih nan AH & Vety department in state chhungah chuan ran movement permit a tul dan ang zelin lo pe mai se tiin an rel.
AH & Vety department leh Fisheries department te chuan mipui rawngbawla hna an thawh naah an kut tihchak na tur dan (legal framework) mumal an nei lo va. Hei hian an hnathawh a ti thuanawp thui hle a. Task Group meeting chuan hei hi a ngai pawimawh hle a. Heng department te hian dan mumal tak hnuaia hna an thawh theih nan Legal Framework tha tak an mamawh tak zet a, hemi bawhzui tur hian AH & Vety Department leh Fisheries Department te chu Study Group din tura thurawn pe in a hriattir nghal bawk a ni.
