No.1976/2020-2020
India Sawrkarin COVID-19 dona atana thawktute puala Pradhan Mantri Garib Kalyan Yojana (PMGKY) hnuaia Insurance Package a siamah leh Mizoram sawrkarin a hnathawkte puala Ex-gratia Lumpsum Compensation pek theihna a siam chungchangah te thil hriat chian tawk loh a awm theih avangin a hnuai ami ang hian sawifiah a ni.
1. PMGKY Package: Insurance Scheme for Health Worker Fighting COVID-19 chungchanga hriattur pawimawhte chu hengte hi a ni.
1) PMGKY hnuaia Insurance Scheme hian COVID-19 kaihhnawiha thihna tawkte chauh a huam a, thihna tawk te hi Death benefit Rs. 50 lakh an chhungte hnenah pek tur a ni a. Damlohna leh damlote inenkawlna senso phuhrûkna a huam lo.
2) He Insurance Package hian COVID-19 dona atana thawktute zawng zawng — sawrkar hnathawk an ni emaw nilo emaw, tawhsual (Accident) avanga thite a huam vek a ni. Sample/hrivei tawh leh rinhlelh phurtu driver te, police te, volunteer hrang hrangte leh tupawh, COVID-19 kaihhnawiha duty an nih a accident avanga boral an nih phawt chuan an chhungte hnenah Rs. 50 lakh pek theih a ni. Claim Certifying authority te atangin COVID-19 dona hna an thawk ngei tih tihchianna (detailment order) neih erawh a tul thung.
3) He PMGKY Insurance Package hian COVID-19 dona ah COVID-19hri kai (COVID patient) te enkawlna kawnga thawktu zawng zawng, COVID patient te nena direct contact nei thei Sawrkar damdawiina thawkte mai bakah Private damdawiina thawk zawng zawngte, volunteer zawng zawngte pawha huam vek a ni. Heng mite hi COVID-19 natna avanga an lo borala nih chuan an nominee te hnenah Rs. 50 lakh pek theih a ni.
4) He Insurance package hian COVID-19 vei a thite maw, COVID-19 dona kaihhnawih thawhna kawnga accident-a thite chauh a huam a, duty te chu natna chi dang leh thil dang avanga thi an nih chuan a huam lo.
5) He Insurance Scheme hi Central Govt., Ministry of Health & Family Welfare hnuaia duan niin, the New India Assurance Company nena thawkduna an ruahman a ni a, premium te pawh Govt. of India hian a pek sak vek avangin mimalin premium an pek a ngailo a, a hranpaa Registration tih pawh a ngailo.
6) He Insurance Scheme hnuaia claim siamturte chuan thihna thlen chhan:-
a) COVID-19 vanga thi an nih chuan, Laboratory Report emaw
b) Accident vanga thi an nih chuan, FIR leh Post Mortem Report te an neih a ngai a ni.
7) Hetiang a nih avang hian he scheme huam chin hi State Sawrkarin Sawrkar hnathawkte tan emaw thawklote tan emaw a lo tihdanglam theiha ni lo a. A chunga sawi ang khian sawrkar hnathawklote pawh a huam vek zawk a, mahse natna leh dam lohna senso phuhrûkna lam ni lo in, thihna chauh a huam a ni,
8) He scheme hi ni 90 chhunga tan a ni a, March 30, 2020 ah intan in June 28, 2020 hian a tawp ang a, June ni 28 hmaa thihna thleng erawh a hnulamah pawh claim theih a ni.
Vawiin ni 12.6.2020 thleng hian Covid -19 kaia boral, insurance claim ngai kan la awm lo a, accident tawka boral erawh pakhat awmin insurance claim-na tura thil tul te buaipui mek a ni,
2. PMGKY Insurance Package in a huam lohte zingah mipuite tana hna pawimawh (Public Service) thawktu tam tak an awm avangin Task Group on Insurance for Frontline Workers fighting COVID-19 te rawtna avangin Mizoram Sawrkar chuan a hnuaia ruahmannate hi a siam bawk.
1) Mizoram sawrkar hnuaia hnathawk, Central Civil Service (Pension) Rules 1972 in a huamte chu, he hripui len chhunga mahni hna rinawm taka an thawhlaia COVID-19 an lo kaia an lo thih palh chuan an chhungte hnenah Ex-Gratia Lumpsum Compensation Rs. 20 lakh pek theih a ni. Amaherawhchu, duty lai nilo, chhungkaw thila zinchhuahna emaw, lo intihhlimna emaw, fehte emaw, mahni chhung leh khat te lo haw mimal thila lo hmuah ang chi te avanga COVID-19 natna kai leh thihpuite erawh chu a huam lo. Hei hian office hnathawktute, P&E duty te, PHE lam duty te leh hna thulh lova thawktu zawng zawngte, an duty laia COVID-19 kai leh thihpuite a huam a ni.
2) Hei bakah hian Mizoram sawrkar hnuaia hnathawk, CCS Pension Rules 1972 in a huam ve loh, Contract employees te, Muster Roll employees te, Adhoc employees te leh Co-terminus employees te, rinawm taka an hna theuhan thawhna lamah COVID-19 an lo kai a an lo thihpui hlauh a nih chuan an chhungte hnenah Ex-Gratia Lumpsum Compensation Rs. 20 lakh pek theih a ni bawk.
3) He Ex-Gratia Lumpsum Compensation hi March ni 31, 2021 leh a hma lama thite huam tura tih a ni a, PMGKY Insurance Package in a huamte erawh hei hian a huam lo thung.
Heng Insurance Scheme te, Ex-Gratia Lumpsum Compensation te hian thihna tawkte chauh a huam tih hria ila, sum leh paite hi nunna hlu tak nena thleng phal chi rual a nilo a, chuvangin COVID-19 dona kawnga damlo enkawltute, hripui dona kawng dang thawktute leh public service hnathawktu zawng zawngte fimkhur leh Sawrkar thuawih tak a kan awm zel hi Task Group on Insurance chuan a duh a, heng Insurance leh Compensation hnuaia sum leh paite hi claim ngailova kan awm theih nan mahni hmazawn theuhah theihtawp chhuah turin mitin a ngen a, thu belhchiandawllo darh thin lakah fimkhur theuh turin mipuite a ngen nghal bawk a ni.
