No.397/2020-2021
Mizoram Sawrkar chuan COVID-l9 Lockdown avanga tangkhangte buaipui turin March ni 30, 2020 khan Task Group on Migrant Workers & Stranded Travellers a din a. He Task Group hian din a nih tirh atangin Mizoram chhung leh State dang, Foreign thlengin Mizoram khua leh tui tangkhang te a buaipui nghal char char a. Tun dinhmunah Mizoram ramchhunga ramdang/State dang mi hnathawk leh zin vei vak tangkhang mek mi 2839 an awm a. Rampawn/State pawn lamah hriat theih chinah Mizoram mi 2576 an ni bawk a, heng zingah hian foreign-a tangkhang mi 185 an tel bawk a ni. Report hi la dawn belh zel a ni a. Mizoram chhungah foreigner mi 47 an tangkhang mek. (Heng tangkhang zat tarlan hi report dawn belh zel a nih avangin a danglam thei reng.)
Central Sawrkarin ruahmanna a siamah chuan State tin ten anmahni State chhunga tangkhangte, mi tu pawh harsatna nei chu a lo tuam hlawm in an mamawh dan a zirin eiin leh awmna tur a pe tur tih a ni a. Chumi atan chuan SDRF sum pawh hman tura ruahman a ni. Central Sawrkar thuchhuah bawhzuiin Mizoram chhunga tangkhangte hi a tul angin Mizoram Sawrkar chuan State Level Task Force, District Level Task Force, Local/Village Level Task Force, Kohhran leh NGO hrang hrangte nen tangkawpin hma a la a. Mi thahnemngai tak takte leh NGO inpeknaah Sawrkar chuan lawmthu a sawi a ni.
Hetiang bawk hian Mizoram pawna awmte report dawn apiang chu a theih ang anga buaipui an ni a. Anmahni hming leh an awmna, an harsatnate ziak chhuakin Mizoram Chief Secretary chuan Central Sawrkar thuchhuak a chunga tarlan ang tlawhchhanin an awmna State Chief Secretary theuhte hnenah a tul anga lo buaipui turin lehkha a thawn zel a. State thenkhat chuan hma la in Mizoram mi leh sa tangkhangte hi a tul anga lo buaipui nghalin ei in tur lo pe tawhte an awm tih report dawn a ni nual tawh a ni. Heng zinga hriat theih chinah chuan Uttar Pradesh, Andhra Pradesh, Madhya Pradesh, Karnataka, Punjab leh Kerala sawrkar te an tel a ni. Hetiang a tanpuina lo petu State Sawrkar chungah Mizoram Sawrkar chuan lawmthu a sawi a ni.
Tuna kan Mizo mipui ten harsatna an tawh mek lai hian Mizoram House hrang hranga office leh slaff ten a tul ang angin State pawna tangkhangte an lo buaipui char char bawk a. Hei bakah hian India ram hmun hran hran a Mizo Welfare Pawl leh Mizo Sawrkar hnathawk leh company a thawk ten namen lovin hma an la a, tlawmngaih chhuahin an mahni sum leh tha sengin tangkhangte tan ei leh in leh awmna tur hmunte an buatsaih sak a, an chungah Mizoram Sawrkar a lawm hle a ni.
Heng bakah hian Brig. B.S.Gill, Chandigarh, Punjab ami chuan Mizoram mi Punjab lama tangkhangte puih a in huam thu dawn a ni a. Amah hi biak pawh niin Chief Secretary in Punjab Chief Secretary hnena a lo thawn tawh kan mi leh sate list pawh zuk thawn a ni a. A ni hian a theih ang anga lo bawhzuiin Mizoram mi tangkhang ten eitur an dawng tih pawh hriat a ni. A chungah leh Punjab Sawrkar chungah Mizoram Sawrkar chu a lawm hle a ni.
COVID-19 Lockdown hi pawh sei a la nih avangin buaina leh harsatna hi a la kiang mai dawn lova, chuvangin Mizoram chhung leh ram pawna tangkhang in report duhte tan online in tangkhang.mizoram.gov.in ah la in report lo te tan in report theih reng a ni a. Hemi bakah hian a hnuaia Task Group on Migrant Workers & Stranded Travellers member te hnenah in report theih reng a ni bawk e:
l. Pu Laldawngliana, Chairman, Additional Secretary, Home Dept. - 9862397173
2. Pu Alexander V Chongthu, Member, Joint Secretary, FCS&CA - 9612166025
3. Pi Margaret Lalrinawmi Fanai, Member Secretary, Deputy Secretary, GAD - 8730927832
