1976/2024-2025

Aizawl, the 9th September 2024: Vawiin khan 54th GST Council meeting chu Sushma Swaraj Bhawan, New Delhi-ah Pi Nirmala Sitharaman, Union Finance Minister and Chairperson, GST Council kaihhruaina hnuaiah neih a ni a. He hunah hian Dr. Vanlalthlana, Taxation Minister member a nih angin a tel a ni. 

GST hi dan pakhat, Goods and Services Tax Act, 2017 hmanga India ram puma bungrua lei leh hralh leh service-a chhiah lakna a ni a. A enkawlna atan pawh hian India ram pumpuia State zawng zawng leh Central (CBIC) Department ten system software pakhat, Goods and Services Tax Network (GSTN) an hmang a ni. He system changtlung tak hian GST hi India ram pumpuiah enkawl a. Chuvangin, he Council meeting pawimawh tak hi Central sorkar leh GST Council hian an ngai pawimawh em em a. Member (Minister) leh Official te hi meeting a tel ngei ngei tura beisei an ni.

Tun țum Council meeting-ah hian agenda tamtak zinga an sawi pawimawh zual zingah Mizoram pawh direct taka min khawih tel thei pawh a awm nuala; chumi zinga pawimawh tak pakhat chu cancer damdawi tax rate 12% atanga 5% a tihhniam hi a ni a. Hei hian damdawi man a tihhniam phah dawn a, a bikin cancer vei tamna Mizoram mipui tan kan zangkhai phah tura ngaih a ni. 

Meeting hi vawiin tlai dar 6:00 thleng khan neih a ni a. Dr Vanlalthlana hian hemi hnu leh naktuk lam hian Ministry dang a mi pawimawhte hmuin a dawr kual leh bawk ang.

GST Council-ah hian Pu R. Zosiamliana, Commissioner of State Tax leh Pu HK. Lalhawngliana, Addl. Commissioner of State Tax te'n Minister hi an țawiawm a ni.