3809/2023-2024

13th February, 2024 : Vawin khan Dr. Vanlalthlana, Taxation Minister hovin Taxation Department hnuaia officer leh staff ten Taxation Auditorium ah 'Sensitization and Consultative Meeting' an nei a. He meeting hi Pu Vanlal Chhuanga, Principal Secretary, Finance & Taxation Department in a kaihruai a, Pu R. Zosiamliana, Commissioner of State Tax leh Taxation Department Officer dangten Department chanchin leh hmalakna hrang hrang an neih dante sawina hun neiin, Department hmachhawpte an sawiho a ni.

Dr. Vanlalthlana, Taxation Minister chuan Taxation Department hi Mizoram Sorkar tan revenue laluttu pawimawh ber pakhat a ni tih sawiin, Department officer leh staff ten theihtawp chhuaha Mizoram tana thawk turin a fuih a. Hmalak dan tur hrang hrang leh a ngaih pawimawh zawngte sawiin, chhiah hi ram mipuite enkawlna tura Sorkarin a lak a ni a, chhiah lakkhawm pung chho zel hian ram hmasawnna a keng tel a ni tih a sawi a. Nasa lehzuala chhiah pawimawhnate mipuite hnena hrilh turin Department hotute a hrilh a ni. Chhiah petuten awlsam taka chhiah an pek theihna tur hmanrua, a bikin computer leh internet hmanga Department-in project hrang hrang a kalpui mek chu tichangtlung lehzual turin hmalak tum mek a ni bawk.

Kum 2023-24 chhunga Mizoram Sorkar-in target a tuk chu Rs. 1000 crores (B.E.) a ni a, chu chu State's Own Tax Revenue Rs. 1084.29 (B.E.) atanga chhutin 92.22% a ni. Hei hian Taxation Department-ah Mizoram Sorkar hi a innghat thuk hle tih a lantir. January 2024 thleng khan Rs.922.83 crores an lakhawm tawh a; thla 10 chhungin thla tin Rs.92.28 crores lalut zel ang an ni. Rs. 1000 crores (B.E.) target hi hmu thei ngei turin an inngai a, thawktute an ṭang hle a ni.