Vawiin chawhma khan Chaltlang Tourist Lodge-ah Taxation Minister Pu Lalsawta chuan Mizoram Taxation Service Association(MITSA) 11th General Meeting leh Workshop on “ A Year Of GST in Mizoram and the Road Ahead” chu a hmanpui.
Taxation Minister Pu Lalsawta chuan state in hma a sawn zel avangin Taxation Department pawimawhna pawh a pung chho zel a; tunah chuan State in sum a thawhchhuah(State Owned Tax Revenue) sengkhawm hna lian ber thawktu Taxation Department hnuaia hnathawkte phei chu mawhphurhna sang tak chelhtute an tih a sawi a. State Taxation Department hnathawh chu sawrkarin a chhuang tih sawiin hmasawn leh zual turin a beisei a ti a. “Taxation Official-te chuan an zone chhunga sumdawngte chanchin an bel hle a tul a; chhiah pek khawtlai leh chhuanlam siam chingte pawh in nawr kal an ngai a. Tin, sumdawngte nena indawrnaah te sawrkar mi leh sa in nih angin nangni kan tax official-te chu hawihhawmna chhuah zawktu nih tum zel ula; in dealer/tax payer te chu tanpui an ngaihnaah te pawh phur taka tanpui zel turin ka chah che u a ni”, a ti. Tunlaia Bank hrang hranga Loan lakna atana Goods & Services Tax(GST) inziakluta, a hnua GST pawh chhunglut lo leh Loan Defaulter nizui mi then khat te thil tih chungchangah pawh Minister chuan a ranglamin Taxation Department leh Bank official ten co-ordination committee neia an inrawntlan thuai a ngai a ni a ti.
Taxation Minister Pu Lalsawta chuan hmasawn turin kalphung thlak ngaite a awm thin tih a sawi a. Sawrkar hmalaknaahte pawh official tharhlam zawk te thawk hmasate aia remhre zawk an awm a nih phawt chuan chung mite chu Senior Official ten ramhlui rilru pu in an up ber ringawt tur a ni lo a ti. “Mipui sawrkarah chuan roreltu atana thlan tlin ten mipuite tana tha tur policy leh programme an duang thin a. Chung policy leh programme kalpuina ti khawtlai thei, dan dinglaite a awm thin bawk a. Programme leh Policy thar leh tha zawk te tha taka kalpui a nih theih na turin dan siamthat ngai lai te lo hmuhchhuah zung zung nachang hriatte chu sawrkar hnathawk vengva te mawh a ni”, a ti.
MITSA 11th General Meeting Cum Workshop on “ A Year Of GST in Mizoram and the Road Ahead” puala hun buatsaih hi Pu Hrangthanmawia, Vice President, MITSA in a kaihruaia. Mizozam in GST a kalpui tawh chungchangah sawihona hun leh tanlak chhoh zel dan tur te sawihona neih leh a ni a. He hun hi Pu C.Vanlalchhuana, Dy.Commissioner, State Taxation Department chuan Resource Person niin a kaihruai thung a ni.
MITSA Programme-ah hian Commissioner of Taxes Pu LH Rosanga pawhin thusawina hun hmangin Taxation Department hmalakna leh Mizoram chhunga chhiah lak lo punchhoh zel dan a tarlang a ni.Commissioner of Taxes in a tarlan dan chuan kum 1985 chhunga Mizoram puma chhiah tling khawm sawrkar hnena thehluh zah chu Rs 40 lakh awrh a ni a. Mizoram chhunga chhiah tling khawmte atanga chhutin kumtina state sawrkar sum lakluh, chhiah tlingkhawm a punchhoh zel na chu 29% anga chhut leh beisei thin a ni a; GST hman hnu hian kumtin 30% aia tam hretin chhiah tlingkhawm chu a pung chho tura rin a ni. Nikum July Ni 1 atang khan GST chu Mizoram pawh in a hmang tan a; GST awm hnu, sawrkar kum liamtaa State Owned Revenue atanga sum lut zawng zawng atanga chhuta 77.37 % chu State Taxation Department in a sengkhawm niin Rs 40,513 Lakh a ni a; Finance Department in Taxation Department chhiah lakkhawm tur a tuksak chu Rs 30,000 lakh niin Target hi Rs 10,000 lakh in an khum a ni. Kumin Financial Year chhung hian Finance Department chuan State Taxation Department chhiah lakkhawm tur zat atan Rs 37400 Lakh a tuk leh a, hei hi khum beisei niin Integrated Goods & Services Tax atanga rawn luh belh tur nen chuan Rs 50, 000 lakh a hawlh phak beisei a ni.
