Ni hnih awh TB enkawlna chungchanga 1st Quarter 2014 Review Meeting chu nimin khan Health Directorate Conference Hall, Dintharah neih a ni.

Meeting hi Dr. Vanlalhruaii, State TB Officer in a kaihruai a, thla thum dana TB enkawlna chungchang thlir letna bahlah miah lova neih thin ani chu lawmawm a tih thu a sawi a. Dr. K. Ropari, Principal Director pawhin thusawina neiin, TB vei hmuhchhuah ten thla 6 atanga thla 8 chhung treatment tha taka lak a pawimawh zia hre thar ila, chu ti lo chuan TB tihdam harsa tak, MDR-TB vei hi kan ramah tam tak kan awm phah thei a ni. A enkawl hun chhung hi kum 2 atanga kum 2 leh thla3 chhung lai ania, damdawi manah pawh nuai 3 chuang lai hman a ngaih avangin TB vei ten damdawi an eitur zat bithliah tha taka an ei ngei a pawimawh a ni. MDR-TB hi tun hma chuan Mizoramah enkawlna kan nei lova, tunah erawh chuan phai lam pan ngai lovin Mizoramah kan enkawl thei ta chu lawmawm a tih thu a sawi.

Dr. Zosangliani, Asst. Programme Officer, Dr. Vanzarliana, MO-STCS leh Dr. Kamlalmuana Singson, Medical Officer, DR-TB Centre ten power point presentation hmangin RNTCP chungchangah thupui hrang hrang neiin presentation an pe bawk.

He quarterly review meetingah hian Jan – March 2014 chhunga TB vei hmuhchhuah chungchang chhui bingna neih ani a. District hrang hrang atanga report-a alandanin TB vei hmuhchhuah mi 481 an awm a, khaka TB hrik hmuhchhuah mi 174 an awm bawk. Enkawl dam 91% awmin, HIV leh TB vei kawp mi 50 an awm bawk. Private Hospital atanga treatment pek mi 11 an awm a, MDR TB vei hmuhchhuah thar mi 10 an awm bawk.

He meetingah hian District hrang hrang atangin District TB Officers, Senior Treatment Supervisors, Senior TB Laboratory Supervisors, Lab. Technician te bakah MSACS, Zoram Entu Pawl leh CMAI atangin an tel.