Vawiin chawhma dar 11:00 khan Health Directorate Conference Hall, Dinthar-ah State Health Society (TB Control), Directorate of Health Services buatsaihin TB natna leh enkawl dan chungchang zirhona 'Sensitisation Workshop on RNTCP' chu Mizoram Film Development Society te pualin neih a ni.
He Workshop hi Dr. Vanlalhruaii, State TB Officer in a kaihruai a. He hunah hian TB natna leh enkawlna chungchang, TB leh HIV inlaichinna, TB benvawn kan tih MDR-TB (Multi Drugs Resistance TB) enkawlna chungchangah inzirtirna neih a ni a, Dr.J.Rinkimi, TB-HIV Coordinator leh Dr. Zosangzuali Asst. Programme Officer ten Powerpoint presentaion hmangin zirtirna an pe a. Advertising Spot chungchangah Pi R.Lalhmudiki, ACSM Officer in kalkhawmte a zirtir bawk a ni.
He huna thusawitu Dr.Vanlalhruaii State TB Officer chuan MFDS ten an sawmna ngai pawimawha hun an rawn hmanpui thei chu lawmawm a tih thu sawiin TB chungchanga mipuite hriattur hrang hrang, TB natna awmzia, a lanchhuah dan, A veite tana Damdawi ei that a tulna leh regular check-up neih a pawimawh zia te sawiin heng thil te hi mipui te hrilhhriat kawnga tanlak pui turin MFDS member-te chu a sawm a. Dr. Hruaii chuan, "TB awm tawh lohna hmun ni tura Mizoram siam tur hian nasa takin hma kan la a, chutiang atan chuan MFDS te hian pawimawhna nasa tak in nei a ni" a ti. MFDS aiawhin President Pu Hmingthangvunga pawhin thu a sawi bawk.
He Workshop a tel te tan hian kumin March ni 24 a neih tur World TB Day denchhenin Spot Advertisement buatsaih a ni dawn a. Lawmman pawh World TB Day-ah hian sem a ni ang.
