Zirlai ten thiamna tak tak neia, hmantlak zawka chherchhuah an nih theih nan zirtirtu te tuaihriamna tur Restructuring and Re-organisation of Teachers’ Education for Mizoram, SCERT siam chu sorkar laipui chuan December 29, 2012 khan a pawmpui a, hemi lawmna pual hian vawiin khan Education Minister Pu Lalsawta hovin SCERT Conference Hall, Chaltlangah inkhawm buatsaih a ni.

Minister Pu Lalsawta chuan Mizorama teachers’ training kalpui a lo nih chhoh dan a chinchhuaka sawiin SCERT leh DIET din a nih dan te a tarlang a. Certificate chauh ni lovin zirna hian chhawrtlak thiamna tak tak zirlai te hnenah a tuh a tul tiin, ram chhung leh ram pawn, sorkar leh mimal company lian tak takah hna an thawh theih nan zirlai ten quality education an neih chu a tul a ni, Minister chuan a ti. Khawvel thang chak tak milin Mizoram zirna hi a kal ve tur a ni a ti a, chutiang ti thei tur chuan zirtirtu ten training tha an neih hi a pawimawh tak zet a ni, a ti bawk. Restructuring and Re-organisation of Teacher’s Education Scheme, sorkar laipuiin Mizoram tana a pawmpui tak hian nasa takin zirtirtu te hmasawnna kawngah awmze thui tak a nei ngei ang Pu Lalsawta chuan a ti bawk.

Restructuring and Re-organisation of Teachers’ Education for Mizoram, sorkar laipuiin a pawmpui tak hian District Resource Center paruk Champhai, Kolasib, Serchhip, Mamit, Lawngtlai leh Saiha a awm te chu DIET puitling a hlankai te; SCERT chu education leh teacher education a sulsutu pawimawh ber a nih angin tihlen a, hun lo la awm turah University ang hiala din theih tura ruahman niin a post kalhmang pawh Professor, Associate Professor, Assistant Professor tih anga kal tir te; SCERT a Mathematics, Science leh Social Science Laboratory din theihna tur sum nuai 26 bakah monitoring cum computer laboratory dinna tur cheng nuai 14 te; SCERT, DIET Aizawl leh Lunglei bakah District paruk a District Resource Centre te building sak leh tichangtlunna tur sum mamawh te leh programme chi hrang hrang bakah equipment leina tur sum thahnem tak institution tin tana pek te a tel bawk a ni.

Inkhawm hi Education Secretary Pu K. Lal Nghinglova IAS chuan a kaihruai a, SCERT Diretor Pi Malsawmthangi’n report pe in SCERT Joint Director Pi Sangthanmawii’n lawmthu sawiin hun hnung a khar a. School Education Director Pu P. Lalchhuanga IAS bakah tualchhung chanchinbu mi engemawzat he inkhawmah hian an tel a ni.