Nimin (4.12.2012, Thawhlehni) tlai dar 3:30 khan ni 5 chhung awh tur “Teacher’s Training on Sports for Development” chu School Education Minister Pu Lalsawta'n School Education Department Conference Hall-ah a hawng.

Hawnna thusawiin Pu Lalsawta chuan Training Programme pawimawh tak buatsaih a ni thei chu lawmawm a tih thu leh hemi atana hma latu te, SSA, School Education Department, Mizoram State Sport Council hotute leh Magic Bus hote chu an inpekna ah fakawm a tih thu a sawi a. Education hi sport tel lo chuan a famkim lo an lo ti thin a, sport thei tak tur chuan taksa lian leh tha ngawt a tawk lova thluak that a pawimawh a, chuvang chuan zirna a hmasawnna nei tur pawhin thluak that leh taksa fit that kawp a ngaihthu a sawi a, SSA Academy hnuai atangin naupang tam takin infiamna ah hlawhtlinna an neih chhoh mek thu a sawi bawkTraining a tel turte chu tih tak zeta he training hi hmang tangkai turin a chah a, kan hnam ti ropui tur hian keimahni hi kan tling ve tawk a ni tih kan hriat a tha tih thu a sawi bawk.

Hawnna Programme hi Pu Lalhmachhuana, State Project Director, Mizoram SSA Mission in a kaihruai a, Pu C. Laltlanthanga, Secretary, Mizoram State Sport Council in inlawmna thu a sawi a, Pu H. Thanchungnunga, State Programme Officer & Sports Promotion Officer, Mizoram State Sport Council in in hmelhriattirna hun a hmang bawk a, Pu Ajay Shetty, Head of Training & Accreditation, Magic Bus, Mumbai in thusawina hun a hmang bawk. Pu V. Lalsiamthara, Addl. State Project Director, Mizoram SSA Mission in lawmthu sawina neiin hun a khar bawk.

Training a hun rawn hmang tu Magic Bus te hi khawvel hmun hrang hrangah sport lamah hma la in an inkulh mek a, Mumbai-ah Headquarter an nei a ni.

Tuna Training Programme a senso tur pawh hi Magic Bus te hian 70% tumin Mizoram State Sport Council in 30% an tum bawk. He training hi SSA hnuaia Health & Physical Instructor te tana buatsaih a ni a, District tin atangin tel an tha hle.