Vawiin chawhma dar 11 khan Champhai D.C. Pu Vijay Kumar Bidhuri DC Conference Hall Champhai-ah kumin Teachers’ Day vawi 50 na ropui taka lawm dan tur rel ho a ni.

Pu K. Lalrintluanga DEO Champhai chuan Teachers’ Day chungchanga hriattur leh ruahmanna hrang hrang te a sawi hnuin Champhai ah chuan hetiang programme hman dan tur duanlawk a ni.

Kumin Teachers’ Day hi a vawi 50 na anih avangin kum dang aia uar zawka hman tum a ni a. Kumdang a Teachers Day Token Flag Rs. 1/- a hralh thin chu kuminah chuan 35000 Token flag siam a niin a thlawna sem a ni thung ang. Rs.10/- zela hralh turin Car flag 1500, Ball pen 12000 leh Key chain 3000 te zawrh chhuah a ni zawk dawn a ni.

Champhai leh Khawzawl khawchhung hmun pawimawh deuh deuhah Teachers’ Day Banner te tar a ni bawk ang. Teachers’ Day Celebration Committee chuan kum danga lo tih thin zirlaiten an ngainat bik zirtirtute hnena present an pek thin chuan nghawng tha lo zawk a neih thin avangin kuminah chuan eng school mahin hei hi tih tawh lo tur a ni tiin present pe duhte chuan school hming in emaw, zirtirtu zawng zawngte in ang zelin an pe tur a ni a ti bawk.

September 5, 2011 ah chuan school tinin Teachers’ Day hi an remchan dan leh ruahmanna an siam angin an hmang ang a, chawhnu lamah I & PR Hall, Chanem ah function dang DC hova hman tura rel a ni bawk.