No.1465/2020-2021

Tunhnaia ruah bawhawk sur khan Darlak bul Teirei luia Lei dawh mek chu ni 27 May, 2020 zing dar 2:15 khan a dona lei chhunpawn chu lain, a chim a. Lei a chim lai hian Contractor-te pawhin ven tuma theihtawp chhuahin tui luanna turte pawh a chim zan hian a sirah an siam a, amaherawhchu an chhan zo ta lo a ni. He lei dawh lai chim hi PWD chuan pawi a ti tak zet a ni.

NH-44A hi Ministry of Road Transport and Highway (MORTH), GOI India hnuai niin PWD hian a enkawl hna a thawk a. He kawng hi Lengpui leh Tripura ramri Langkaih lui thlenga hna thawh lai mek niin he hna hi Gayatri Project Ltd., Hyderabad te hnenah ni March ni 3, 2011 khan pek a ni a, March thla tawp lamah hna hi an tan nghal a ni.

Teirei Lei hi a laiah ban (Pier) pahnih awmin ban kar 3 nei, a sir ve ve hi 10.00 meter-a sei an ni a, a lai ban kar erawh chu 40.00m a ni. Tuna chim hi chu ban kar laia Beam-te chauh a ni. Teirei Lei hi kum 2018 April thla khan Pile Foundation leh abutment-te siam tan a ni a, nimahsela, ruah tui tlak hnu khan chhun zawm hleih theih a ni ta lo va, Dec. 2018 khan chhunzawm leh niin pile leh abutment-te hi kumin February thla khan siam zawh a ni a. Tun a chim ta, a lai span hi Pre-stessed Conerete Girder (Beam) a ni a, beam hlai zawng hi 2.60m niin, beam hi I-section a ni a, a chhah zawng chu 1.20m a ni thung. Pre-stress concrete girder beam hi pali a ni. Beam thenkhat hi Covid -19 avanga, lock-down hma khan chhun zawh hman a
ni a. lock down vanga Cement awm tak loh avangin zawh theih a ni ta lova, May 25 khan beam concrete chu chhun zawh chauh a ni a, an la char tha hman lo a ni.

A chung a tarlan ang khian, beam te hi Pre-stress tih hnuah a chakna hi awm chauh tur a ni a, Pre-stressing ti tur hian hmanrua leh mihring thiam bik ngai a nih avangin Lock-down avang khan mithiam bik chu an lo lut thei ta lo a. Chuvang chuan, tuilianin a beam dotu ber a tihchhiat takah chuan prestress hman loh beam hian chakna a la neih loh avangin a chim ta a ni.

He Lei siam lai chim ta hi Contractor-te hna thawh lai mek a nih avangin Contractor-te hian anmahni sum sengin an siam that leh mai tur a ni a. An hna hi hetiang lakah hian Insured a nih bawk avangin, he mi avanga Contractor-in a chan leh hlohte hi a claim leh thei bawk a ni. Hna laklawh lai hetia lo chim ta hi PWD chuan pawi ati tak zet a, thal a nih ve leh chhunzawm leh vat tur a hmalak a ni ang.