No.1340/2020-2021 


Vawiin chawhma dar 8:40 AM khan Telangana a Mizoram mi leh sa tangkhang, Shramik train hmanga lo haw te chuan tluang takin Bairabi rel station an lo thleng a. Dr H. Lalthlangliana, Deputy Commissioner, Pu Vanlalfaka Ralte, SP leh Kolasib district thuneitu dangten an lo hmuak.

Rel in Bairabi a lo thlen rual hian rel chhungah ei leh in pek nghal an ni a, Screening point 10 kaltlanga endik vek an nih hnuah an district theuh panna tur bus ruahman sa ah luh tir nghal an ni. Rel station a chhuahsan veleh bus in Meidum khaw daia RAT neihna hmun an pan nghal a, Liason Officer te kaihhruaina hnuaiah anmahni hawna tur district theuh, bus 32 hmangin pan tir an ni.

Vawiina Telangana atanga lo haw te hi an vaiin mi 474 an ni a. Aizawl district a cheng mi 216, Lunglei district a cheng mi 30, Serchhip district a cheng mi 29, Kolasib district a cheng mi 40, Champhai district a cheng mi 41, Siaha district a cheng mi 35, Mamit district a cheng mi 22, Lawngtlai district a cheng mi 23, Saitual district a cheng mi 12, Khawzawl  district a cheng 25 leh Hnahthial district  a cheng mi 2 an ni a.
Kolasib district mi leh sa lo haw te hi Quarantine Facility ah dah nghal vek an ni.

Kolasib district thuneitute ruahmanna in Bairabi rel station a lo hawte sulhnu thianfai tur Sanitation team din a ni a, anni hian Rel station a duty-te leh zin haw te sulhnu thenfai ngai awm te chu fimkhur tak leh felfai takin an senghawi a ni. Mizoram chhunga ram dang mi tangkhang hawna tur leh mamawh ngaihtuah saktu tur, Stranded Migrant Workers Monitoring team din a ni bawk a ni.

Attachment

  • Loading attachment...