Vawiin chawhma khan Civil Hospital Aizawl Eye Ward ah Tele-Opthalmic Vision Center Pi M.Zohmingthangi, Secretary, Health in a hawng.
Hawnna a neih zawh hian inkhawm tawi te buatsaih a niin he hun hi Dr.Lalthanmawia, Director of Health Services in a kaihruaia, thusawiin Health Secretary chuan Health Department a hnathawktute chu tanrualna tha an neih avang leh Documentation te an tih that avangin hlawhtlinna tha tak an neih thin a. Hnathawh that te hi inthlahdah san mai lova, Krista hnung zuitu an nih angin midangte tana malsawmna an nih theihna zawn theuh ah tan la zui zel turin a fuih a ni. Hemi zawh hian Dr.F.Lalhmingthanga, State Programme Officer, Blindness chuan an hmalak tawh te a tarlang a Mizoram pumah Eye Donation(Midangte tana malsawmna) nih kawngah hma an sawn thu leh Thih hnu a mit pe phal in ziaklut zat chu mi 1651 a nih tawh thu a sawi. Eye bank kan neih awm hnu ah mi 30 zet ten phal taka an mit midangte tana an pek avangin vawiin thleng hian mitkhawhmulo mi 45 zet ten khaweng an hmuh theih phah tawh nghe nghe a ni a ti.
He hun ah hian Dr.A.S.Rathore, ADG(O), SATHI chuan thusawina a nei bawk a, thingtlang kilkhawr zawk ami te\'n an chhawr tangkai ngei a beisei thu a sawi bawk. Dr.Lalrinliana Sailo, Director, Hospital and Medical Education chuan lawmthusawina neiin hun hnung a chang a ni.
He Tele-Opthalmic Vision hi Society for Administration of Tele-medicine and Health care Infomatics(SATHI) NGO, Delhi a hmunpui nei te\'n an rawn bun a ni a, anni hian kum 3 chhung in Civil Hospital a hnathawktute an enkawlpui dawn ani.Tun maiah chuan Aizawl, Lunglei leh Champhai ah te dah hmasak phawt aniin District dangah pawh dah leh thuai tur a ni.Tele-opthalmic Vision khawl hmang hian thingtlang leh District dang atang te in mit an zai emaw enna kawngah te hmunpui lam pan kher ngai lovin inenkawlna a dawn theih dawn a ni.
