No.6641/2020-2021 

Aizawl, the 23rd November 2020: Vawiin khan Aizawl-a Telecom Advisory Committee(TAC)din thar thutkhawm hmasa berah Pu C. Lalrosanga chuan Mizoram leh ramdang – Myanmar leh Bangladesh inrina hmunte chu inbiakpawhna lam tih changtlun a tul a tih thu a sawi a. Chutiang bawkin thenawm state-te nena ramri-ah inbiakpawhna tha leh changtlungzawk ruahman a tul a ni a ti. Mizoramah BSNL chuan hma thar nasa taka a lak a beisei a, hun rei tak General Manager awpna hnuai a an awm tawh loh hnu a General Manager thar Pu Arun Kumar a lo awm ta chu lawmawm a tih thu leh ani kaihhruaina hnuaiah hian hmasawnna nasa tak a beisei thu a sawi a.Pandemic leh  leh sum harsatna kan tawh mek laia BSNL staff ten thahnemngai taka an hnate an thawhna leh inpekna avangin staff te chu fakawm a tih thu a sawi bawk a ni.

Sum leh hnathawk chungchanga harsatna an neihte chu amah leh Pu K.Vanlalvena,MP(RS) leh TAC member-te hnenah inthlahrung hauh loa thlen hreh lo tura chahin, anni’n sorkar laipui leh state sorkar thuneitute hnena an lo bawhzui thin tur thu a sawi bawk a.

Rajya Sabha MP Pu K. Vanlalvena pawhin mimal enkawl mobile service chhiatna hmun kilkhawr apiang luh chilh turin BSNL hotute chu a ngen a. Ramri a insumdawntawnna tura ruahman hmunah te inbiakpawhna tha zawk ruahman turin a ngen bawk a ni.

TAC member-te chuan Mizorama district thar 3-te chu ngaih pawimawh ni se an duh thu an sawi a, Mobile tower hman tlak tawh lohte chu hman tlak a siam a nih loh chuan senghawi mai ni se tiin rawtna an siam bawk a ni.

Mizoram BSNL hian General Manager hi rei tak an nei tawh lova, Pu C. Lalrosanga’n sorkar laipui thuneitute a nawr avangin tun hnai khan an rawn dah leh a. Tun dinhmunah BSNL hian telephone pangngai hmangtu 10,026 a nei a mobile hmangtu hi nuai 2, sing 3 sang 5 leh 466 an awm bawk a. Nikum lawk atanga an tih thar internet chak chi FTTH pawttu pawh 5,123 zet an awm tawh a.Vawiin meeting ah hian TAC Member te pawh an tel tha hle a ni.