Parliamentary Secretary to the Chief Minister Pu Lal Thanzara chuan Mizo thalaiten infiamna lamah theihna hrang hrang haichhuah tham an nei hriain Mizoram sorkar chuan infiamna hmunhma engemawzat a chhawpchhuah sak tawh a, a dang pawh ngaihtuah sak zel a tum dawn a ni, a ti. He thu hi Marova Memorial Basketball Open Torunament hmawrbawkna nizana Zarkawt Recreational Centre-a a hmanpuinaa a sawi a ni.

Pu Lal Thanzara chuan infiamna hi taksa sawizawina leh hriselna a nih mai bakah zuk leh hmuam leh ruihtheihthil laka vengtu tangkai a ni, a ti a. Chief Minister leh Sports Minister chak tak hmalaknain indoor stadium, playground leh hmanraw dang dang te pawh chak taka ruahman zel tum a ni bawk, a ti. Marova hriatreng nana a pa Pu R.Sangkhuma te chhungkua, Khatla-in lawmman hlu tak an buatsaih avanga a lawmthu sawiin infiamna peng hrang hrangah te pawh mihausa leh sumdawng awmthei ten tun aia nasa zawka an sum leh pai thawh phal turin ngenna a siam a ni. Parliamentary Secretary chuan FIFA leh AIFF hmalaknain Mizoram-ah football academy tha tak buatsaih tum mek a nih thu leh hemi atan hian Mualpui-a Rajiv Gandhi Stadium pawh en thlithlai mek a nih thu a sawilang bawk.

Mizoram Basketball Association (MBBA) huaihawt Marova Memorial Basketball Open Tournament-ah hian team 36 lutin, Final-ah TBL Basketball Club-in Vikings chu 78-64 in an hneh a. Champion Team ten No mawi, medal leh tangkafai cheng 50,000/- dawngin, 2-na hian No mawi, medal leh cheng 25,000/- an dawng a, Team tel zawng zawngin an thlen san dana zirin ‘Match Money’ an dawng vek bawk. MBBA hian 1st North East School Basketball League chu November ni 13 atangin Hawla Indoor Stadium, Pitarte Tlang-ah a thleng dawn a, mi thahnemngai leh sumdawng remchangte puihbawmna an ngen nghe nghe a ni.