‘Mizoram khawpui fai inelna-2017’ hmachhawn tura inbuatsaihna kal zelah tukin zing khan Mizofed kawtzawl, Venglai Lunglei-ah Lunglei District Sanitation Task Force buatsaihin Thematic Cleanliness Drive hawnna programme hlawhtling taka hman a ni. He progamme hi Lunglei East bialtu MLA Pu Joseph Lahimpuia’n hmanpuiin Lunglei DC leh District Sanitation Task Force Chairman ni bawk, Pi Lalzarmawii, IAS chuan Lunglei District chhunga faina beihpui thlak chu a hawng.

Thematic Cleanliness Drive hawnna programme, Pu Andrew Lahruaia, DUDO kaihhruaiah hian sawrkar Department hrang hrang hotute leh zirna in hotute bakah khawltang hruaitute, tlawmngai pawl aiawhte, zirlaite leh mipui thahnem tak an tel.

Faina kawnga tlawmngai pawl pawimawh tak Clean Lunglei Founder President ni bawk MLA Pu Joseph Lalhimpuia chuan mipui kalkawmte hnenah fuihna thu sawiin khawpui tifaitu kan nih theih loh pawhin a ti bawlhhlawh tu nih loh hram I tum ang u, a ti a. Faina leh thianghlimna kawnga beihpui thlak ah Lunglei mipuite thawhho puiah sawmin Lunglei hmel mawi na turin mitin in mawh kan phur theuh a ni, a ti bawk.

Lunglei DC Pi Lalzarmawii chuan hawnna thu sawiin Lunglei khawpui chu a zau hle a, heng zawng zawng ti fai tur hian mitin kan pawimawh tiin a faina tur hian mawhphurhna kan nei theuh a ni, a ti. Kan in leh lo, kan chheh vel kan tihfai mai bakah kan rilru sukthlek faina lamah kan her rem a ngai a, mipui rilruah faina kan tuh chuan inhrilh hriat chawp ngai lovin kan fai reng thei dawn a ni tiin khawtlang hruaitute pawhin faina kawngah mawhphurhna kan nei sang hle a ni a ti bawk.

Tukina Thematic Cleanliness Drive hmanna ah hian Clean Lunglei, Lunglei District VC association leh YMA Sub Hqrs. Lunglei aiawhte pawhin faina kawnga hriattur pawimawh tak tak an sawi bawk a ni. He huna kalkhawm ten fai tura thutiam an sawirual hnuah faina kawngzawh neih a ni a, khawpui lun laia bawlhhlawh thenfai nghal a. Thematic Cleanliness Drive kalpui chhung hian Lunglei khawpui veng hrang hrang ah faina hnatlang runpui neih a ni dawn a ni.

‘Mizoram khawpui fai inelna-2017’ ah hian Lunglei district chhungah Category II(Other Towns) pahnih – Hnahthial leh Tlabung an tel dawn bawk a. SDO (Civil) kaihhruaina hnuaiah heng khaw pahnih te hi an in buatsaih mek bawk.

Attachment

  • Loading attachment...