No.725/2020-2021

Mizoram Sawrkar hmalakna kaltlangin thenawm State Assam, Manipur, Meghalaya leh Tripura a Mizoram mi tangkhangte chuan nimin April Ni 30, 2020 atang khan Mizoram-ah an lo haw tan a. Khual lo thleng te lo dawngsawnga, an hriselna endik, venhimna siam, ei leh in pek leh tul dangte buaipui turin Champhai District Administration, Police, Medical team, Quarantine Centre Nodal Officer-te leh Procurement Nodal Officer-te chuan a tul angin hma an la zel a, tangkhang lo let hmasate chu Quarantine Centre-ah dahluh tawh an ni.

Champhai District mi leh sa lo haw turte hi nimin April Ni 30,2020 atang khan lo haw tanin, vawiin chawhma thlenga Champhai lo thlengte chu Khawkawn Tuivai kaltlanga Manipur atanga lo haw mi 4 leh Vairengte kaltlanga lo haw Assam a awm mi 4 te an ni a, an hriselnate enfiah niin, Rapid Antibody Testing hmanga test an paltlang hnu hian DPRC Quarantine Centre, Keifangtlang-ah ni 14 chhung dahhran turin dahluh an ni. Dah hran hun chhung hian an hriselnate uluk taka vil reng ani ang a, chhuah hunah endik leh a ni ang. Tihian tun thlenga lo haw tawhte chu an vaiin mi 8 an ni a. Kawnglaka thang mek, Manipur atanga lo haw mi 12 leh Assam atanga lo haw mi 2 te an awm bawk a ni.

Tun thlenga Champhai District mi lo haw tura in report te chu an vaiin 40 an ni a. Manipur atangin 21, Meghalaya 5, Tripura 1 leh Assam 13 te an ni.