1669/2025-2026
Dated Thenzawl, the 30th September, 2025: Thenzawl, September ni 30, 2025: Vawiin hian Police Training School, Thenzawl Parade Ground-ah 7th Batch Assistant Sub-Inspector (Ministerial), 2025 trainee mi 18 te Passing Out Parade (POP) neih a ni.
He hun hi Chief Guest Pi Meghna Yadav, IPS (IG-Training) in a hmanpui a. General Salute (Salaami Shastra) pek a ni a, passing out parade enna hunin a zui a. Pu Lalthakima, MPS, Principal, PTS, Thenzawl-in dikna leh rinawmna vawng chunga mahni hna theuh an thawhnaah an mawhphurhna hlen chhuak tura intiamna a neihtir bawk.
Chief Guest chuan trainee te chu an training hlawhtling taka an zo thei chu a lawmpui a, an hna thawhnaah discipline, inpekna leh dikna vawng tlat turin a chah a. Ministerial officer te chu police organisation-a lang tlang leh mawhphurhna lakna kawnga an pawimawhna a sawi lang bawk.
Training chhunga tithate hetiang hian lawmman pek an ni:-
1. All Round Best lawmman - ASI (M) Lalhunruata Fanai hnenah hlan a ni a.
2. Best in Indoor Subjects - ASI (M) Lalhunruata Fanaihnenah hlan niin
3. Best in Outdoor Training lawmman - ASI (M) Jeremy Lalhminghlua Ralte hnenah hlan a ni bawk.
ASI (M) trainees te’n March past hmuhnawm tak an entir a, he hun hi Pipping Ceremony-in khar a ni a, training chhuakte koki-ah an chhungten arsi an belsak a ni.
He training hian thla 3 (chawlhkar 14) chhung a awh a, Police Department-a ministerial hna thawhna tura an inbuatsaihna a ni. ASI (M) trainees te hian training khauh leh hautak tak an nei a, Indoor leh Outdoor lama training an nei kawp a ni. Outdoor training hi ni 61 chhung neih a ni a, weekend leh holiday-ah te pawh neih thin a ni. Physical Training (PT), Drill leh ralthuam (weapons) lam te pawh zirtir an ni. Outdoor hi zing dar 5:00-ah PT an tan a, zan dar 9:00-ah an tawp thin a, hengte hian discipline leh chhel taka awm turin a hruai a ni.
Indoor training-ah hian ministerial hna thawhna tura pawimawh subject 16 zirtir an ni a, nitin dar 10:00 AM - 1:00 PM inkarah neihpui thin an ni. Heng Indoor-ah hian: New Criminal Laws, Criminal Minor Acts, Mizoram Police Manual, Mizoram Police Act, Central Civil Service Rules, Conduct leh Leave Rules, Pension leh Financial Rules, Treasury leh Audit procedures, Income Tax Rules, Medical Attendance Rules leh Provident Fund Regulations te an zir a ni.
He Indoor leh Outdoor training programme inbuk tawk tak in a tum chu trainees te discipline, physical fitness leh an hnathawhna turah thiamna tak tak neih theihna tur a duan leh buatsaih ani.
Police Training School Thenzawlah hian Basic Training bakah In-Service Training hrang hrang pre-promotion Course, Cadre Course leh Refresher Course hrang hrangte kalpui thin a ni.
