NLUP Implementing Board Chairman Pu R. Selthuama, MLA leh NLUP Nodal Officer te chuan nimin leh vawiin khan Thenzawl leh a chhehvela NLUP tanpuina dawngtute tlawhin an hmalak dan a hmunah an enfiah. Department hrang hrang hnuaia trade hrang hrang thlangtute chuan NLUP kaihhruaina ang takin hma an la em tih enfiahin an hmalak dan tih that leh siam danglam ngaite an inhrilhfiah a, Chairman Pu R. Selthuama chuan beneficiary te kawmna hun hmangin an dinhmun leh hmalak dan te, harsatna an tawhte a sawipui zel a, NLUP dawngtute chu NLUP kaihhruaina ang zel a an thawh that leh that loh sorkar-in ngun takin a vil reng dawn a ni tiin thawk tha lo te chu pek chhunzawm an nih dawn loh thu chiang takin a hrilhfiah nghal zel bawk.

Thenzawl leh Buangpui khuaa NLUP dawngtute zingah hian thenkhat thawk tha em em leh entawntlak an awm laiin NLUP kaihhruaina anga thawk tha lo leh beisei pha lo an awm nual bawk a, an chungchang hi la ngaihtuah nawn tura dah a ni.

Chairman Pu R. Selthuama hi Dr. Jerome Rokima, Director, Soil & Water Conservation department leh Pu Rosiama Vanchhawng, IFS, Chief Conservator of Forests (Admn.) te bakah Aizawl leh Serchhip atangin NLUP Nodal officer ten an tawiawm a ni.