Chief Minister Pu Lal Thanhawla chuan sorkarin hmathlir a neihte tih puitlinna kawngah a arkhawthim dai mai mai lo a ni, a ti a, tha tura kan hriatah chuan huaisen takin hma kan la a ni, a ti. He thu hi vawiina HSLC leh HSSLC 2013 a ti tha bik, toppers te hnena Education Department ina a buatsaih Chief Minister Award semna Vanapa Hall-a neiha a sawi a ni.

Chief Minister chuan zirlai ti thate chawimawina neih a ni thin chu a ropui a, zirlaite cho phurtu ni a, Zoram pumah zir tur tha thawn chhuaktu nise a duhthu a sawi a. He Award buatsaih theih anih naah Student Self Support Union (SSU) nawrna leh thahnemngaihnaah lawmthu a sawi bawk a. Chief Minister chuan thalaite tan khawvel thar, umphak loh nei biklo tur siam tumna kawngah huaisen taka hmalak zel a ni, a ti a. Education tha ziktluak neilo tan tunlai khawvelah eizawnna tha hmuh a harsa tih hria in sorkarin Education Reforms Commission India ram puma a pahnihna din a ni tiin, a report pawh India ram pumah thedarh a ni a, thalo ti an awmlo a ni, a ti. A tih puitlinna turah sum tam tak angaih avangin duh angin a kal chakpui theih loh a ni, a ti.

School chungchangah Chief Minister chuan sorkar school aiin private leh kohhran school ten result an nei tha thin zawk tiin, provicialization ai chuan changtlung zawka kalpui dan ngaihtuah zawk tha sorkarin a tih thu a sawi a. Sorkarin sum harsatna a neih bakah provincialise hi tha kan tilo a ni, a ti a. Vote duh vang (populist zawngin) zawnga kal kan duhlo a, kan arkhawthim dai mai mai lo a ni, a ti. Sorkar schoola zirtirtu ten private leh kohhran school-ah an fa te kal tir an duh zawk tih sawi thin te hian thil tam tak a sawi a ni, Pu Hawla chuan a ti.

Khualzahawm Pu Lalsawta, Education Minister chuan tunlai khawvel tharah computer leh internet tello chuan a kal theih tawh loh avangin, kan hun thar mil zela kal turin leh education lamin buaina lutuk a tawh loh nan Education Reforms Commission (ERC) din a nih thu a sawi a. A report erawh hman theih chin leh theih loh chin a awm avangin muang angin kan lang mai thei a, commission report reng rengte hi kum sawmli hnuah te pawh hman tan chauhte a awm a ni a tiin, ERC hman thu ah pawh kan muanglo a ni, a ti.

Pu Sawta chuan hun inthlakah keimahni pawh kan inthlak loh chuan hmantlak loah kan awm thei a, chuvangin thiamna bik chherchhuah anihna turin Mizoram Skill Development Council pawh din anih thu a sawi a. Zir dan phung, system of learning pawh thiamna tak tak pawchhuak thei tura kalpui a pawimawh a ni, a ti. Tum kan nei a, a hlenchhuak turin kan kalpui ngar ngar a ni, a ti.

HSLC leh HSSLC 2013 a toppers chawimawite hi mi panga an ni a, chungte chu HSLC topper Lalfakzuala, HSSLC Arts topper S.Noki, Science ah Guddu Kumar Singh, Commerce ah A.Zodintluanga leh Vocational ah Lalhmingmawii te an ni a. Award hian pawisa fai Rs.50,000/- leh citation a keng tel a ni. Chawimawina te hi Pi Lal Riliani, President, Indian Society on Tobacco & Health Mizoram Chapter in a sem a ni.