968/2026-2027

Dated Kolasib: The 11th June, 2026: Vawiin  khan 'Thing hi Rangkachak anga hlu, Nunna tinreng bul a ni' tih thupui a hmangin Parish Hall, Venglai Kolasibah Green Mizoram Day hman a ni a. Pu Lalfamkima, Dy.Speaker chuan khuallian niin he hun hi a hman pui.

Khuallian Pu Lalfamkima chuan kan ram ngaw te kum tinin a zim tawlh tawlh tih a sawi a, hei vang hian kan rama ngaw te hi awmze nei zawka humhalh dan kan zawn a ngai a ti. 'Kan ei leh in tur kan neih theih nan ram ngaw tha kan mamawh tih sawiin, 'Kan thawk tur boruak thianghlim kan neih theih nan thing kan mamawh a, in tur tui thianghlim kan neih that theih nan thing kan mamawh a. Kan ei tur kan thar theih nan Lei tha kan mamawh a, chutiang chu ram ngaw atangin kan nei thei ani a ti a. Hei vang hian thing hi rangkachak aiin a hlu zawk a, Mihring te min chawmtu a ni tih kan hriat thar a tul a ti.

Dy Speaker chuan, khawvel thang zelah changkanna kawng kan zawh zel a, hmasawnna hna kan thawh tam tak hian Ram ngaw a ti chereu lo thei lo a. Hei vang hian a in balance theih nan hma kan lak a ngai a. Thing phun kan uar a tul hle a ni' a ti a. Pu Famkima chuan Green Mizoram Day ah thing tiak tam tak kan phun thin. Kan thingphun te kan enkawl a, kan vil zui a pawimawh a ti bawk.

He hun kaihhruaitu nibawk Pu H. Dolianbuaia, District Bawrhsap Kolasib pawhin thu sawiin, Thing leh Mihringte hi kan in kungkaih tlat a ni a ti a. Kan khawvel a lum zel a, kan khawvel lum zel laka min chhawk thei tur chuan thing kan phun tam a ngai a ti a. Kumin a thing phuntu department te chuan an thingpuite an enkawl a ngaih thu sawiin, Thal chho ah te a bul vel sam fai a, leitha te an pek a tul dawn thu sawiin, a thi a lo awm palh a nih pawhin a danga an thlak a ngai thu sawiin, hei hi department ten inelna ah an hmang dawn tih a sawi.

He hun hmanna a hian kumin a Fire Prevention hman laia kangmei venna kawnga thawk tha te hnenah Khuallian hian lawmman a sem a, Kangmei venna lama hma la tha ber ah Serkhan thlan niin Khuangpuilam chu 2 na an ni a, 3 na chu Pangbalkawn an ni. Saipum, Thingthelh leh Nisapui ten consolation Prize an dawng bawk a ni.

He programme zawh a hian District Sports Stadium, Kolasib bul hnai velah Dy. Speaker, Deputy Commissioner leh official dang ten thing tiak phunna hun an neih zuih bawk a ni.