Vawiin khan Thingtlang khaw fai inelna, Swachh Survekshan Grameen-2018 chu Champhai District chhunga bul tan anih theihnan District Bawrhsap Dr. Naveen Aggarwal chuan  DC Conferenec Hall, Keifangtlangah a hawng. Champhai District atangin he inelna huangah hian thingtlang khua 79 an tel dawn a ni.

Dr Naveen Aggarwal chuan faina kawngah Mizoram chuan nasa taka tan a lak thu leh hmasawnna tam tak hmuhtheiha a awm thu a sawi a. Khawtlang tanrualna tha tak leh neitu nihna thinlung pu chunga faina kawnga mitin ten an tihtur an hlen thin chu Mizoramin faina kawnga hma a sawnna  mellung pawimawh tak a ni, a ti a. Champhai District mipui Swacch Survekshan Grameen inelnain a huam zawng zawngte chu inelna thianghlim tak hmachhawna, a tam thei ang ber tel turin a chah a. Zawhna chhan tur awmte leh an ngaimawh zawngte a tha lam emaw thalo lam pawh nise tlang taka thuneitute hrilhhre zel thin turin a fuih a. Duhkhawplohna leh inzirbelhna tur awmte sawi lang zela, hmasawnna leh insiamthatna atana hmang zel turin a chah a. Line Department leh khawtlang mipuite chu thawhhona tha tak hnuaiah   District-in result duhawm tak aneih ngei theihna tura tan la theuh turin a chah nghal bawk a ni.

Hawnna hun hi Er. V. Laldanmawia, SDO, PHED, Project Sub-Division Champhaiin a kaihruai a. Pu VL Chama Hnamte, President Sub-Hqtrs. YMA Champhai chuan phungbawma YMA sawm an nih angin District tana hmalakna kawngah theihtawp chhuahpui an inhuam thu leh sawrkar programme pawimawhte hlawhtlin theihna turin  member-te inkarah thawhhona leh venpuina tha tak neih a tul thu a sawi bawk a ni. Er. J.Kapkima, EE, PHED & Member Secretary SBM (G) chuan  inelna kalphung leh a endikna tehfung hrang hrangte sawifiahna a nei a. Pi Julie C.Mawii, District Coordinator, SBM (G) Champhai District chuan lawmthu sawina neiin hun a khar a ni.   

Swachh Survekshan Grameen-2018 hi Swachh Bharat Mission (Gramin)   programme hnuaia thingtlang khua faina kawnga an dinhmun endik leh nihna (National ranking) pekna tur a duan a ni a. He endiknaah hian India ram State leh District fai ber leh bal berte chu tehfung hrang hrang hmanga thlan chhuah tur a ni dawn a.  He programme hi Government of India, Ministry of Drinking Water & Sanitation chuan India ram puma District 698 te tuam vek thei turin July Ni 13, 2018 khan a lo hawng tawh a ni.

Mizoram District hrang hrang endikna hna hi thla thar August Ni 1, 2018 atang hian Hindustan Thompson Pvt Ltd. atanga mithiam lokalte chuan an nei tan dawn a, tehfung chu hetiang hian a ni ang: Khawchhung faina, mimal in, School, Anganwadi, Sakhaw hmun leh vantlang hmuna sanitation dinhmun in za zela 30 point a keng ang a, Mipuite aw (feedback from citizens) in za zela 35 kengin, Online Report (Data updation as per IMIS) chuan za zela point 35 a keng ve thung dawn a ni. 

Faina kawnga School, Anganwadi centre, Kohhran hmun leh vantlang hmunte, inthiarna in neih that leh that loh dan bakah mipui rilru sukthlek leh faina kawnga hma lakna chungchanga mipui mimir ngaihdante thlirin endikna hi an kalpui dawn a. Hei bakah hian Swachh Bharat Mission (Gramin) hmalakna chungchanga report hrang hrang, pawna inthiar awm leh awm loh chungchang leh hnathawh thlalak report chungchangahte thlengin endik hna hi thawh a ni ang. Heng endikna hrang hrang atang hian State titha berte chu October Ni 2, 2018 hian lawmman pek tum a ni a. He survey hi thingtlang faina endik chungchanga hmalakna lian berte zinga mi a ni dawn a. Hemi hmang hian India rama District 698 chhunga thingtlang khaw 6800 leh Vantlang chetlakna hmun 34,900 te endik tum a ni. Tin, mihring nuai 50 chuang atangin faina kawnga an hmalakna leh ngaihdante (feedback) zawh a ni bawk dawn a ni.