No.749/2020-2021
Mizoramin COVID-19 a dona kawngah harsatna hrang hrang tawh mek zingah damlote mamawh thisen pek chungchangah Health Minister Dr.R.Lalthangliana chuan a hnuaia mi ang hian mipuite hnenah Ngenna a siam :
"Kan hriat theuh angin Covid-19 hripui leng chuan khawvel a tuam mek a, hriselna lama thawktute pawh he hripui leng hian a ti luhai takzet a ni.
He hripui leng karah hian natna dang avanga damlo tam tak te nunna chhan nan thisen mamawhna hi a la sang em em reng si a, chuvangin he hripui len chhunga thisen mamawh tlakchham a awm loh nan theihtawp chhuah a tan kan lak tlan a ngai tak meuh a ni.
Thisen petu tur te leh a lo buaipuitu zawng zawng ten, he hripui len laia Thisen pek dan tura inkaihhruaina `Mizoram State Blood Transfusion Council’ in a siam hi zawm hram ni se la. Covid -19 laka invenna tura, hmaituamna hmante, kut fai taka sil fo te, metre khat aia hnaiah midang awm hnaih loh tur tih hi hre reng ila.
Thisen pek chungchangah Sawrkar hmalakna thawhpui zel leh hemi kawnga hma la tura Association for Voluntary Blood Donor (AVBD) an lo awm hi Mizoram mipui tan a thlamuanthlak hle a.
Damlo mamawhte tan leh nunna chhan nan he hripui leng karah hian thisen pek hi i chhunzawm zel ang u."
