National Human Rights Commission, New Delhi chuan an publication hrang hrang a pholan tur thlalak tha leh changkang tak tak an mamawh thin a. Ramchhung State hrang hrangah te hetiang thlalak hi a khawnkhawm mek reng a ni. Mizoram atang pawhin hetiang thlalak te hi an rawn dil ve angin khawnkhawm mek a ni a. Thlalak lama tui mi leh tarlan tlak nei te chuan Directorate of I&PR ah inhriattir theih ni se. Thlalak mamawh te chu naupang, hmeichhia, mipui mimir dikna humhalh lantir thei zawng te, retheihna umbo, tribal te dawmkanna, NREGS, school naupang chaw chhun pek leh tar pension lamhawi te duh a ni a. Chhehvel boruak leh nungcha humhalh lantir thei, climate change thlalak leh rualbanlote hamthatna tura hmalak dan hrang hrang thlalak te chu Commission hian a mamawh bawk a. Agriculture, Education, Cultural, hnam nunphung tarlang chi bakah HIV/AIDS do kawnga  State in hma a lak dan tarlang thei thlalak te chu an duh zingah hian a tel bawk.